Nongpoh, Naiwieng 27
Ka jingïai bteng ka sorkar Assam ban shna ïa ka surok ha ka shnong Bakhlapara kaba kaba hap hapoh ka Hima Nongspung jong ki thaiñ khappud ka Ri Bhoi District, ka la pynlong ïa ka Hynñiewtrep Achik National Movement (HANM) ban shim rai ban leit ai syndon da ka jingthoh sha ka Khasi Hills Autonomous District Council (KHADC) bad ruh sha u Deputy Commissioner (DC) ka Ri Bhoi District.
Kum ban shu pynkynmaw biang, ka HANM Western Ri Bhoi ha ryngkat bad u Syiem ka Hima Nongspung, u Pa’iem Fredrick Syiemïong dang shen ki la leit ban pynsangeh ïa ka jingshna surok jong ka sorkar Assam naba katei ka jaka ka dei kaba dang hap pura hapoh u pud u sam jong ka Hima Nongspung ha Ri Bhoi District. Hynrei kumba long haduh mynta, ka jingshna ïa katei ka surok, ka dang ïaid shaid-shaid wat hapdeng ka jingpyrshah jur ka Hima Nongspung bad ka HANM.
Haba kren sha ki lad pathai khubor, u Working President ka HANM Ri Bhoi District bad u President ka HANM Western Ri Bhoi, u Bah Sumar Lyngdoh, ki la pynpaw ïa ka jingsngewkhia jur halor kane ka jingwan kyntur pud jong ka sorkar Assam wat hapdeng ka jingïaid shaphrang ka jingïakren pynbeit pud hapdeng ka jylla Meghalaya bad Assam.
Ki la ong ruh ba kim lah satia ban shu sngap jar halor kane ka kam da kaba ban ruh wat ki bor sorkar ka jylla Meghalaya kim shym la leh eiei ban pynsangeh ïa katei ka jingwan kyntur pud bad pyntip ruh ba kumba long mynta, kaba sah jong katei ka surok ka long satang ban siang rong.
Halor kane ka bynta, na ka liang ki nongïalam ka HANM ki la shim da ka rai ban leit ai da ka jingthoh sha ka KHADC, u Deputy Commissioner ka Ri Bhoi bad ruh sha u Syiem ka Hima Nongspung ba ki dei ban shim khia mardor ban pynsangeh ïa katei ka jingwan kyntur pud ka sorkar Assam bad ruh ban ïakren bad ka sorkar jylla ba kan leh ïa kaba donkam halor kane ka jingwan kyntur pud jong ka Assam.
