Shillong, Naiwieng 27
Ki nongñiah bad nongbud ïa ki kali kit umphniang hapoh ka lama jong ka North East Petroleum Mazdoor Union, Guwahati, ha ka Lah Sngi U Blei ki la byrngem ban sangeh ban wan sha Meghalaya naduh ka 29 tarik Naiwieng hadien ba ki la kynnoh ba ki la don ki nongñiah bad nongbud ïa ki kali kiba la shah pyndik bad shah bat ha ki pulit ka jylla ha kine ki khyndiat sngi.
Ha ka shithi ba la thoh sha u Myntri ka tnat sam marbam mardih ka jylla, u General Secretary ka Union, u Ramen Das, u la ong ba naduh ka 24 tarik Naiwieng, ki pulit ka Meghalaya ki la pyndik ïa ki nongñiah bad nongbud ïa ki trok kit umphniang kiba wan na Assam halor ka jingkynnoh ba ka don ka jingleh shukor ha kaba ïadei bad ka umphniang ha 18 Mer, Ri-Bhoi.
U Das u la ong ruh ba ki pulit ki la bat ïa ki katto katne ngut ki nongñiah bad nongbud ïa ki trok kit umphniang kiba la don ha kawei ka jaka bam ja (Dhaba) ha 22 Mer, bad la pynrung da ki jingujor pyrshah ïa ki.
Nalorkata, u la ong ba ha ka 25 tarik Naiwieng, ki pulit ki la bat ïa ki katto katne ki nongñiah bad nongbud ïa ki trok kit umphniang khlem ki daw kiba biang. Namar kine ki jingjia, u Das u la ong ba ki nongñiah bad nongbud ïa ki trok kit umphniang ki la sngew sheptieng ban wan rung sha Meghalaya.
“Ngi sngew ba lada la lap pylleiñ-pylleiñ ïa kino-kino kiba leh be-aiñ, ki bor ba dei khmih ki lah ban leh ïa kaba donkam. Hynrei ym dei ban pynshitom pat ïa ki briew kiba lui-lui,” la ong u Das ha ka shithi sha u Myntri.
U la kam ruh ba katkum ki jingtip ba la ïohlum, ki pulit ka jylla ki la leh da ka bor ïa ki nongñiah bad nongbud ïa ki trok kit umphniang hadien ba ki la kyntait ba ki la donkti ha ki kam be-aiñ. La kynnoh ruh ba la shim jubor ïa ki jingthoh na ki bad la shondur shondar ruh ïa ki.
Namarkata, u Das u la ong ba kine ki nongñiah bad nongbud ïa ki trok kit umphniang ki la rai ban ym wan rung shuh sha Meghalaya la ka dei jong ka kompani IOCL, BPCL lane HPCL naduh ka 29 tarik Naiwieng katba ym pat lah ban pynbeit ïa kane ka kam kumba la kdew haneng.
Ha kajuh ka por, ka Union ka la dawa ba dei ban pynlong da ka jingtohkit halor ka jingleh jong ki pulit Meghalaya bad ban weng noh ïa baroh ki jingujor pyrshah ïa ki nongñiah bad nongbud ïa ki trok kit umphniang. La dawa ruh ba dei ban sangeh noh shi syndon ïa ka jingpyndik ïa ki nongñiah bad nongbud ïa ki kali kit umphniang.
Nalorkata, u Das u la ong ba ki Dealer bad Transporter kim ju ai satia ïa ka bainong kumba la buh da ka sorkar India, PF, ESI, bad kiwei ki jingmyntoi wat hadien ba la pynsngew la bunsien. U la ong ruh ba ka Union ka kwah ba dei ban pyntreikam ïa baroh ki aiñ kiba ïadei bad ki nongbylla.
Lah ban kdew ba katei ka shithi na ka Union ka la wan hadien ba ki pulit ka jylla ha ka Sngi Saitjaiñ ki la ïoh kem ïa 14 ngut ki briew kynthup ïa uwei uba dang hapoh 18 snem ka rta na Ri-Bhoi halor ka jingkynnoh ba ki la donkti ban tuh umphniang hashwa ban khleh bad die pat ha ka dor kaba tad sha kiwei.
Ka jingkem ïa kitei ki briew ka long hadien ka jingïoh jingtip halor ka jingjur ki kam tuh umphniang ba la pynkit da ki trok kit umphniang bad ka jingkhleh ha ka umphniang ha ki jaka bapher-bapher ha shi lynter ka surokbah NH-6. Nalor kitei kiba la shah kem, ki don ruh sa kiwei pat kiba la phet krad mar sien wan poi ki pulit.
Ha ka jingleit khynra, ki pulit ki la kurup ruh bun tylli ki tiar kiba don bynta ha ka ban pynlang umphniang ba la sei na ki trok kit umphniang kiba ïaid lynti. Ha kajuh ka por, la lap bad kurup ruh ïa ki tiar ba la pyndonkam ha ka jingkhleh ïa ka umphniang ha kitei ki jaka.
Ki pulit ki la ong ba ki trok kit umphniang ki hap ban ïaid lyngba ka shi lynter ka NH-6 ha Ri-Bhoi hashwa ban leit sha kiwei pat ki bynta ka Jylla Meghalaya, Barak Valley, Assam, Mizoram bad Tripura.
Ynda la poi ha kine ki jaka ha surokbah NH-6, ki sei kumba 100 litar ka umphniang na ka trok bad mih na kitei ki jaka sha ki jaka ba dei ban leit. Kane baroh ka shim por 10-15 minit. Kine ki jaka ha surokbah ki long kiba la pynïeng shi por kiba don ïa ki khyrdop ba-heh ba la ker da ki tin sop ïing ban pyntikna ba yn ym ïohi eiei na surokbah bad ki don ïa ka khyrdop mih bad rung na bynta ban pyntyllun sted ïa ka kam.
La lap ruh ba kawei ka jaka pdeng kaba pyntrei ïa kane ka kam ka biang lut nadong-shadong ïa ki tiat ki tar na bynta ban tuh bad pynsaphriang ïa ka umphniang da ki buit ban khleh eiei ha ka. Ban sngewthuh kham bniah ïa kane ka kam shukor, dei ban pynleit jingmut na ka jingpynïeng jong ki ha shi lynter ka surokbah ha kaba kumba 400 tylli ki trok kit umphniang ki ïaid ha ka shi sngi.
Ïa kane ka umphniang ba la tuh, hadien la die ha ka dor kaba duna sha ki jaka bapher-bapher bad pyndonkam ruh ha ka ban khleh, ha kawei ka liang kaba wanrah ka jingduhnong kaba jur ha ka ïoh ka kot bad ka jingduhnong ïa kito ki nongpyndonkam ki bym don jingtip eiei halor kane ka kam.
Kumba ka long, la ai da ka jingujor ha thanat Crime Branch, Shillong bad ka jingtohkit ka dang ïaid naba la suba ba ka don da ka kynhun.
