Shillong, Naiwieng 27
U President ka BJP Meghalaya u Rikman G Momin ha ka Lah Sngi U Blei u la ong ba ka seng ka long kaba kloi ban pdiang lada u Dr Mukul Sangma, uba dei u Myntri Rangbah barim ka jylla u wan pynïasoh sha ka seng ha kano-kano ka por ruh.
Haba kren sha ki lad pathai khubor, u Rikman u la ong ba ka jingkhang jong ka BJP ka plie beit na ka bynta kino-kino kiba wan ban pynïasoh sha ka seng bad kumta kan long shisha ka jingkmen lada u Dr Mukul un wan pynïasoh.
“Haduh mynta, ngam pat don jingtip eiei halor kata ka jingïakynduh jong u Dr Mukul bad ki nongïalam bahalor jong ka seng,” la ong u Rikman bad bynrap ruh ba un nym don jingsngew eiei satia ban leit ïakynduh ïa u Dr Mukul, lada ka don ka jingpynsngew.
