Shillong, Naiwieng 27
Ka Khasi Hills Autonomous District Council (KHADC) ha ka Lah Sngi U Blei ka la leit ban khynra ïa ki dukan jong ki bar jylla ha kaba ïadei bad ki kot ki sla kiba don ha ki bynta jong ka Madan Ïewrynghep, Fire Brigade ter ter shaduh sha Laitumkhrah.
Ha katei ka jingleit khynra la lamkhmat da arngut ki Executive Member (EM) ka KHADC kiba kynthup ïa u Bah Fantin J. Lakadong uba dei khmih ïa ka tnat Taxation bad u Bah Teibor Pathaw uba dei khmih ïa ka Land & Building Bye-Laws ha ryngkat ka jingsynranlang ka tnad Enforcement.
Ha katei ka jingleit khynra, ka KHADC ka la lap ba ki don ki dukan bar jylla kiba don ha kitei ki thaiñ kim don satia ïa ki kot ki sla kiba biang hynrei ki la shu shong be-aiñ.
Kumta mar-mar na ka liang ka Council ka la khang khyrdep noh shwa shipor ïa kitei ki dukan tat haduh ynda ki la pynbiang ïa ki kot ki sla kum ka Trading Licence bad kiwei kiwei ki kot donkam.
Haba kren sha ki lad pathai khubor, u Bah Fantin J Lakadong, u la ong ba na ka liang jong ka District Council ka la pynbeit ha ki khyndiat sngi kiba la dep ba ka lah donkam ban leit khynra ïa ki dukan jong ki bar jylla ha kaba ïadei bad ki kot ki sla ym tang ha ki thaiñ Laitumkhrah, Malki, Majai hynrei na ka liang ka District Council kan sa ïaid kylleng kylleng ka sor ban leit khynra, namar ba kane ka jingleit khynra ïa ki dukan ka dei kum shibynta ha ka rukom treikam jong ka Council ban pyntikna ba kan ym don ka jinglyngkar ha ka rukom pynïaid ïa ki ïew ki hat.
U Bah Lakadong u la ïathuh ba ka District Council ka la ïoh ban pdiang ïa shibun tylli ki jingujor halor ka jingplie dukan ki bar jylla khlem da pynbiang ïa ka ‘Trading License’ bad khlem da siew ïa ka khajna kum ka ‘Professional Tax’ kaba dei ka kyndon kaba ki hap ban siew, bad u la ong ba haba ki Khasi ki siew ïa ka khajna kum ka ‘Professional Tax’ hynrei kumno pat ïa kiwei la pyllait ei.
“Mynta ka sngi ngi la leh ha Laitumkhrah bad ngi la ïaid ter-ter namar bunsien ngi la ïoh ka jingujor ba bun ki dukan ki la pynïaid ïa ka khaïi ka pateng ka jong ki khlem ka Trading License, kiba nabar ki wan khlem ka ‘Professional Tax’ kaba dei ka kyndon kaba ki hap siew”, la ong u Bah Lakadong.
Ha kajuh ka por, u Bah Fantin u la pyntip ba ha katei ka jingleit khynra la lap ba kumba 80% na ka 100% na ki nongshong dukan hapoh Laitumkhrah ki dei kiba bud ïa ki kyndon da kaba pynbiang ïa ki kot ki sla, hynrei kiba bun kim tip ba ki hap donkam ruh ban siew ïa ka Professional Tax.
“Ngi ki Khasi ruh haba ngi leh ïa kino-kino ki kam, ngi hap siew ïa ka Professional Tax bad kam long ban pyllait ei pat ïa kiwei”, la ong u Bah Lakadong.
U Bah Fantin u la ïathuh ba ha katei ka sngi, ka District Council ka la peit ruh ha kaba ïadei bad ka Labour License jong ki bar jylla kiba la wan trei khlem kino-kino ki kot ki sla kiba biang.
“Ngin nym sangeh tang mynta ka sngi hynrei ngi dang ïai ïaleh ban khynra na ka por sha ka por”, la kubur u Bah Lakadong.
