Shillong, Naiwieng 27
Ki lad pathai khubor na ri thor ha ka Lah Sngi U Blei ki la pynbna ba ka jingtih da ki briew hajan ka jaka ba ki 41 ngut ki nongbylla ki la sahkut ha Uttarakhand ka la sdang.
Kane ka jingtih ka long kumba ju tih dewïong thliew khnai ha Meghalaya lane kata ka ‘rat-hole coal-mining’ kaba ju tip da baroh bad ïa kaba la khang pyrshah da ka National Green Tribunal naduh u snem 2014.
Kitei ki 41 ngut ki nongbylla ki la sahkut mynta la palat ar taïew hadien ba ka la don ka jingtwa katba ki dang shna ïa ka Tunnel.
Ka jingtih da ki briew kumba tih thliew khnai ka la sdang ha ka por kumba 7 baje janmiet jong ka Lah Sngi U Blei hadien ba ka kor Augur Drill ka la julor na ka daw ba ki bniat jong ka ki la tyngkhuh bad ki nar rod kiba don ha Tunnel bad kiwei pat ki jingtwa.
Kane ka jingtih da ki briew ka ïasyriem bad ka jingtih dewïong thliew khnai (Rat-hole coal-ming) kaba long ka rukom tih kaba la shah kheiñ ba ka long kaba sahdien.
Hadien ba kiwei pat ki rukom ki la pulom noh, ki bor ba dei khmih ki la rai ban shu phah tih noh da ki briew nalor bad na kynriang jong ka jaka ba kitei ki nongbylla ki la sahkut.
U Secretary ka sorkar jylla Uttarakhand, u Neeraj Khairwal, u la ong ba la pyndonkam 24 ngut ki briew ban tih ïa katei ka jaka bad kine ki trei baroh 24 kynta ha ki lai bynta.
Katba ka jingtih da kine ki briew ka dang ïaid, ka kor Auger Machine kan thep ïa ki Pipe 800 mm. Hadien ba la lah ban thep ïa kine ki Pipe 800 mm, ki nongtih kin rung lyngba une u Pipe shapoh bad kin sei ïa ki maw/khyndew.
Ka sah sa tang kumba 10 haduh 12 metre ban poi ha ka jaka ba don kitei ki 41 ngut ki nongbylla, bad na ka daw jong ka jingpulom ka jingtih da ki kor ki bor, la hap ban pyndonkam noh da ki briew ban tih ïa ki bynta ba dang sah.
Ka kor Auger Machine ka la lah ban ksam haduh 46.8 metre, hynrei la hap ban sangeh noh ïa ka jingpyndonkam ïa ka namar ka jingthut hadien ba ka la ïatyngkhuh bad ki nar rod bad kiwei ki jingtwa.
