Shillong, Naiwieng 27
U Co-Chairman ka Meghalaya State Planning Board, u Bah John F. Kharshiïng, ha ka Lah Sngi U Blei u la pyntip ba ki don haduh 200 tylli ki kam kiba lait ha Ri Slovakia na ka bynta kiba nang ban kren ïa ka ktien phareng, bad ka don ka jingwan wad ïa ki nongtrei ïa kine ki kam na ka thaiñ Shatei Lam Mihngi.
Ha u kyrwoh khubor, u la ong ba ka Slovakia ka dei ka Ri kaba don ha syndah ka Ri Poland ha dewbah Europe.
Ïa kane, u Bah John u la ong ba la pyntip da u Yash Gurung, CEO & Founder Director, Asporea, Siliguri, bad ki ophisar jong u ha ka jingïakynduh mynta ka sngi bad u Bah John ha Shillong.
Katei ka kynhun kaba na Siliguri ka long kaba don ki jingïadei ha ki Ri bapher bapher bad ki la pyntip ba ïa mynta ki don kine ki 200 tam ne duna ki kam ha ka kharkhana shna kali Peugeot 208, Citroen C3, jong ka Company Stellantis, Slovakia ha ka jingsiew kaba T. 63,000 haduh T. 72,000 shi bnai bad ka don ruh ka jingsiew kaba heh na ka bynta kiba trei palat por (extra time) lada ki nongtrei ki dei kiba smat bad kiba trei shitom, la ong u Bah John.
U la ong ruh ba ki la pyntip ba ka kynhun jong ki ka don ka jingïateh bad ka kynhun pynïoh kam kaba heh na Kathmandu, Nepal kiba la don lypa ki jingïadei bad katei ka kharkhana shna kali, ha kaba ki don ka lad ban pynïoh ïa kitei ki kam lada ki nongwad kam ki don ïa ka jingtbit.
Kane ka kharkhana kali ka dei kaba heh bad ki shna 62 tylli ki kali ha ka shi kynta bad ki pynmih haduh 1,395 tylli ki kali shi sngi ha Slovakia. Ha katei ka jingïakynduh katei ka kynhun ka la mynjur ïa ki jingai jingmut jong u Bah John uba la ong ba ïa kane ka kam un sa pynbeit ka jingïakynduh bad ki heh jong ka tnad Labour jong ka sorkar jylla ban ïakren sngewthuh kumno ba ki samla ITI/Polytechnic bad kiwei kiwei hapoh Meghalaya kin lah ban shim ïa katei ka lad ka kabu ban mih shakhmat ban trei shitom ban poi sha kitei ki kam. Ki la pyntip ruh ba ki don ruh ki kam ba bun jait kiba kane ka kynhun ka la don lypa ki jingïadei ha ki Ri bapher bapher ha kaba ka jingdawa ïa ki nongtrei ka jur bha kum ki nurse, ki nongtrei hapoh ki jaka sumar hospital bad kiwei kiwei ha Japan bad Germany tangba ha kitei ki Ri donkam ban pyndep shwa ïa ar bynta ha ka ktien Japan bad German.
Kane ka kynhun ka la pyntip ha u Bah John ba kine ki jingplie lad ba ki nong India kin ïoh leit sha kiwei ki Ri ki dei naduh ba u Myntri Rangbahduh ka Ri, u Narendra Modi, u la wanrah ïa ki kpait saiñ kam ban plie lad ïa ki nong India ban leit shabar lyngba ki jingïateh bad ki Ri bapher bapher lyngba ka tnat bar ri khamtam namar mynta ka don ruh ka jingsdang duna ka jingdon paid (population) ha kiba bun ki Ri ha Europe.
