Nongstoiñ, Naiwieng 27
Kan long lehse ka nuksa kaba bha tam ïa ka imlang ka sahlang khamtam ha kine ki sngi ba mynta ba watla u la mad shibun ki jingeh ha ka jingïaid lynti ha ka jingim ka jong u, ha kaba u la long tang u nongñiah taksi bad die ice cream, die kot khubor hapoh ka sor Nongstoiñ ha ki por ba la leit bad kumta ter ter na kawei ka kam sha kawei pat hynrei mynta u la long pynban uwei na ki ‘riew rangbah uba la kiew bad paw ha ka dong ka thaiñ, haduh ba mynta u la ïoh ban plie syndon ïa ka park kaba la ai kyrteng ka ‘Martyr’s Eco Park cum Resort’.
Une u dei Bah Martyr Kharjahrin na ka shnong Tiehsaw, Nongstoiñ bad uba dei ruh u kurim ka Kong Dahunlang Parïong bad lehse lyngba kane ka jinglah jong une u rangbah bad ka ïing ka sem ban pynurlong ïa katei ka park, kan long ka jingmyntoi kaba khraw ïa ka dong ka thaiñ.
Ïa katei ka Eco Park la shna ha kawei na ki jaka harud jong ka surok Nongstoiñ by-pass kaba dang hap hapoh ka shnong Mawrusyiar jong ka dong Pungsiyor, West Khasi Hills bad ha kane ka park la ïohi ruh ïa bun jait ki jingïalehkai ïa kaba la shna bad buh na ka bynta ki nongwan jngohkai.
Ïa katei ka park la plie paidbah ha ka sngi Nyngkong da u MLA barim ka Nongstoiñ u Bah Macmillan Byrsat, uba long ruh u Co-Chairman ka MEDC kum u kongsan ha ka jingdonlang u Sordar ka shnong Mawrusyiar, u Sordar ka shnong Pyndengrei, ki ophisar na ka tnat Industry, ki bahaïing ha sem, ki kur ki kha jong u Bah Kharjahrin, ki lok ki jor bad kiwei kiwei.
Ha katei ka sngi, ka ïing ka sem u Bah Kharjahrin ki la ïoh ruh ban ai sngewbha sha ka Balang Presbyterian Ladweitang, kumjuh ruh la ïoh ban ai sngewbha sha ki phra tylli ki longïing ba duk da ki jaiñ kup syaid ïa kaba u MLA barim bad kiwei ki la ïoh ban aiti, bad la pynshit pynshngaiñ ïa katei ka sngi da ki jingrwai na ki samla.
U Bah Macmillan haba kren kum u kongsan u la ai ka jingkitbok jingkitrwiang bad kyrkhu kyrdoh ban ïohi ba u Bah Kharjahrin un nangkiew katba nangmih ki sngi.
U la ong, “Ha ka jingim ka jong nga, nga ngeit ba don ar tylli ki bor ha u briew, kawei ki ong ka bor kaba phin lah ban leh ïa kano-kano ka kam lada phi don ha ka kyrdan bad kawei pat ka bor kaba ngi lah ban leh ka long ba ngi lah ban weng ïa ki jingeh da ka jingshemphang”.
Shuh shuh u Bah Macmillan u la ong ruh ba teng teng la ju pyrkhat ba tang uta uba la nang ban pule uba nang uba tip uba lah ban leh eiei hynrei em, da kaba u la bynrap ba u Bah Kharjahrin um dei uba la pule hynrei u dei uba stad bad uba shemphang.
