Shillong, Naiwieng 27
Ka Khun Hynñiewtrep National Awakening Movement (KHNAM) ka la pynpaw ka jingdiaw halor ka jingmynjur ban thaw ïa ka Expert Committee haba ïadei bad ka Reservation Policy kaba la shimpor ban pyndep ïa ki kam, bad ka seng ka la ong ba naduh basdang, ka la kren shai ba kam mon satia ban thaw ïa ka Expert Committee namar ka dei ka kam kaba shimpor.
Hynrei namarba kiwei pat ki seng saiñ pyrthei kim sngap ïa ka jingpynsngew jong ka KHNAM ha ka jingïalang ki seng saiñ pyrthei kaba long ha ka 31 tarik Jymmang, 2023, ka seng kam lah leh ei ei bad haba ka Sorkar ka thaw ïa kata ka Expert Committee, ka seng kam lah ban shu sngap khamtam haba ïohi ba ka kam ka suki.
Haba kren sha ki lad pathai khubor, u General Secretary ka KHNAM, u Bah James M.A. Neng u la ong ba wat la ka seng kam ïahap ïa ka jingdon ka Expert Committee hynrei namarba la thaw da ka Sorkar, ka seng ka leit ïakynduh ïa u Chief Secretary kum ka jingbuddien ban ïoh jingshai halor ka Expert Committee.
U la ong ba u Chief Secretary u la ïathuh ba ka Expert Committee ka la dep ban shong ka jingïalang kaba nyngkong ha ka 23 tarik mynta u bnai bad ka jingïalang kaba ar kan long ha ka 6 tarik Nohprah, bad hadien kata ka Sorkar ka lah ban khot biang ïa ka jingïalang jong baroh ki seng saiñ pyrthei.
U Bah James u la ong ba na ka liang ka KHNAM naduh basdang ka kwah ba dei ban shu phah ïa ki jingpynsngew bad jingai jingmut sha ka Sorkar Jylla haba ïadei bad ka Reservation Policy ha kaba ka tnat aiñ kan sa khmih bniah ïa kita ki jingai jingmut bad jingpynsngew jong ki kynhun bapher bapher khnang ba ka kam kan ïaid sted.
Hynrei namarba mynta la don ka Expert Committee, ka kam ka la shimpor bad na ka liang ka KHNAM ka la kyntu ïa u Chief Secretary ba kane ka kam ka dei ban dep kloi haba sdang jong u snem 2024.
Shuh shuh ka KHNAM ka la phah jingthoh ruh ban dawa ba ka Reservation policy kan treikam 80 na ka 100 ha ki private sector lane ki shlem treikam ki bym dei jong ka Sorkar namarba tang ka Sorkar hi marwei kam lah ban ai kam ïa ki samla.
U Bah James u la ong ruh ba ka KHNAM naduh basdang ka la dawa na ka Sorkar ban pynïaid beit shakhmat ïa ka jingthungkam namarba ka ktah ïa ka rta ki samla kiba dei ban wad kam, ym ban dawa pynsangeh ïa ka jingthungkam kumba la dawa da kiwei pat.
Ka KHNAM ka la ong ruh ba da ka jingthaw ïa ka Expert Committee, ka jinglut ruh kan long shibun namarba ki riewshemphang jong ka Committee ki don shlem treikam ha Lachumier, Shillong bad ha nongbah Delhi namarba haba ki trei ïa ka kam, ka Sorkar ruh ka hap ban pynlut.
