Shillong, Naiwieng 27
U President ka Bharatiya Janata Party (BJP) Meghalaya u Rikman G Momin u la ong ba um ïohi eiei ïa ka rukom treikam ka MP ba mynta jong ka Tura ka Agatha K Sangma hynrei u la kyntait ban kynthoh ne kren eiei pat halor u MP ka Shillong u Bah Vincent H Pala.
“Ngam don satia ka jinghun ïa ka rukom treikam jong ka MP ba mynta ka Tura namar ngam ïohi kam eiei bad ngam tharai ruh ba kan lah ban wanrah skhim eiei,” la ong u Rikman haba kren sha ki lad pathai khubor ha ka Lah Sngi U Blei ha shlem treikam ka BJP.
“Kumba ka long mynta, ngam tip eiei ïa ka rukom treikam ka jong ka Agatha. Ngam tharai ba ka la leh bha eiei namar ki paidbah kim shym la ïoh pdiang ïa kino-kino ki skhim na ka sorkar kmie bad kam shym la leh eiei na ka bynta ki paidbah,” la ong une u nongïalam ka BJP ha Meghalaya. Haba kylli pat ba u ïohi kumno halor ka rukom treikam u MP ba mynta ka Congress na Shillong u Bah Vincent H Pala, u Rikman u la kyntait ban kren eiei halor ka rukom treikam jong une u MP na Shillong.
“Ngam don jingtip satia eiei bad ngam pat ju ïakynduh ruh ïa u, kumta ngam lah ban kren eiei la u trei bha ne em, bad dei tang ma phi ki paidbah kiba lah ban tip kumno u treikam,” la ong u Rikman halor u Bah Vincent.
