Shillong Naiwieng 27
U Rikman G Momin uba la dep ban shimti ïa ka kam President ka BJP Meghalaya u la ong ba ka seng ka la long kaba la pynkhreh na ka bynta ka ilekshon sha ka ïingdorbar Lok Sabha ka ban sa long ha u snem ban wan.
Haba kren sha ki lad pathai khubor ha ka Sngi Nyngkong, u Rikman u la ong, “Ka jingpynkhreh ïa ka ilekshon ka la don bad ïaid, namar ki nongtrei ka seng ki don beit kumjuh hynrei la shu bujli tang ïa ki nongkitkam bad ruh ïa u President.”
Haba kylli hato ki la don ne em kiba la wan shakhmat ban pan tiket na ka BJP ban ïakhun ilekshon MP na Shillong bad Tura, u Rikman u la ong ba ki la don katto katne ngut bad ïa mynta yn nym pat lah ban pyntip ïa ka kyrteng jong ki bad yn sa tip tat ynda ka Sengkmie na Delhi kan sa pynbna ïa ka kyrteng jong ki.
Haba kylli ba balei ka BJP kam pat lah ban pynbna kyrteng kumba la dep ban leh da ka NPP bad VPP, u Rikman u la ong ba ka BJP ka pher na kine ki seng bad ka treikam bad ïaid katkum ki kyndon bad ki nongrim jong ka.
Ha kaba ïadei pat bad ka jingpynpaw jong u Bah A.L Hek ba u kloi ban ïakhun ïa ka ilekshon MP, lada ka BJP kan ai tiket ha u, une u President ka BJP Meghalaya u la ong, hooid ba ka la don ka jingpynpaw hynrei kan shong pat ha ka rai ban shim da ki nongïalam ka seng.
“Ka kamram ka jong nga ka long ba ngan phah ïa ka kyrteng jong baroh kito kiba la pan ïa ka tiket sha ki nongïalam ba halorduh ka BJP,” u la ong bad bynrap ruh ba ka seng kan pdiang sngewbha lada don kino kino ki kynthei kiba pan tiket ban ïakhun ïa ka ilekshon, namar kan long kaba biang bad paka tam na ka bynta ka seng lada ïoh ban sei da ki kynthei naba dang shen la lah ban pyntreikam ïa ka bhah kaba 33 persen ïa ki kynthei.
Ha kawei pat ka liang, hadien 2 bnai ba la shimti ïa ka kam President ka BJP Meghalaya, u Rikman G Momin ha ka sngi Nyngkong, ula pynbna ba ka BJP Meghalaya kala thaw ïa ka Executive Committee (EC) ba thymmai kaba la ïoh jingmynjur na ki nongïalam na Delhi.
U la pyntip ba kin don hynriew ngut ki Vice President hapoh ka State BJP bad kine ki dei u Bernard Marak (Tura City), Khrawboklang Basaiawmoit (East Khasi Hills), Dipul R Marak (South West Garo Hills), Gagan Jain (Shillong City), bad Riya Sangma (Ri-Bhoi District).
Ki General Secretary ki long Dr. Evarist Myrsing (Ri-Bhoi) bad Er. Lakhon Biam (West Jaiñtia Hills). Kin don ruh hynriew ngut ki Secretary hapoh ka seng bad kine ki dei u Hakabiang Lyngdoh (West Jaiñtia Hills), Bernadette Lyngdoh (East Khasi Hills), Adamkid Sangma (Tura City), Brivia Thabah (East Khasi Hills), Premananda Koch (South West Garo Hills), bad Er. Bipen Pradhan (Shillong City). U Sarwan Jhunjhunwala u la shah thung kum u Treasurer ka Jylla bad ïa ka Kong Sukhi Pariat la thung kum ka President jong ka Mahila Morcha.
