Shillong, Naiwieng 27
Ha ka step jong ka 27 tarik mynta u Naiwieng ha ka por 5 baje eiei, kawei ka ïing kaba dei ka jaka buh tiar bad ka jaka buh tiar marbam mardih kaba don ha Sngithiang, Lower Mawprem ka la kem ding kynsan.
Na ka liang ki bor shnong haba ïoh jingtip halor katei ka jingjia ki la leit mar-mar sha katei ka jaka bad ki la pyntip noh sha ki bor pulit pynlip ding ban wan mardor sha katei ka jaka.
Ha kaba ïadei bad kane ka jingjia, na ka liang U Nongsaiñ Hima u la phone ïa u Bah Jop Pyrbot uba dei u Rangbah Shnong ka Dorbar Shnong Mawprem, ha kaba u la ïathuh ba ka daw jong ka jingpluh katei ka ïing ka dei na ka daw ba don jingthut ha ka bording. Nalor nangta u la ïathuh ba ha katei ka jingjia ym shym la don satia kano-kano ka jingjia kaba sngewsih hynrei tang ka jingduhnoh ïa ka ïing bad ki mar ki mata kiba don hapoh katei ka ïing.
U Bah Pyrbot u la ïathuh ba namar ba ka dei ka jaka ka bym lah satia ban rung ka kali shapoh, ki paramarjan marpa kiba sah hajan katei ka ïing ki la ïaleh ban pynlip ïa katei ka ding da kaba theh um bad kat da poi ka kali pynlip ding katei ka ding ka la kham duna.
U Bah Pyrbot u la ïathuh ruh ba ki briew kiba sah ha katei ka ïing, ki la buh tiar buh tar bad ki marbam ha katei ka ïing kaba don halor katba sha ka bynta kaba shapoh pat ki sah ma ki.
Shuh shuh u Bah Pyrbot u la ïathuh ba haduh mynta ym pat lah satia ban ïoh jingtip halor ka jinglut jingsep ba la lut ha katei ka jingpluh ding hynrei na ka liang ka Dorbar Shnong kan sa noh jingïarap sha katei ka longïing longsem.
