Shillong, Naiwieng 27
Ka jingbteng ki nongñiah ar shaka ban kamai khlem da bud ïa ki kyndon aiñ ba la pynmih da ka Sorkar Jylla ka la pynsyier ïa kiba bun khamtam haba ki hap ban leit jingleit da ki ar shaka kiba kamai beaiñ khlem pat pynrung kyrteng bad kino kino ki kompani kiba la ïoh laisen na ka Sorkar Jylla.
Ka Kynhun Myntri ka Sorkar Jylla ka la dep ban mynjur ïa ka kyndon aiñ kaba tip kum ka Meghalaya Taxi Aggregator Operation Rules, 2020 ha kaba yn shah ïa ki nong-ñiah ar shaka ban kamai da kaba pynrung kyrteng shwa bad kano-kano ka kompani kaba la ïoh laisen na ka Sorkar.
Ka Sorkar Jylla ka la ithuh ruh ïa ki ar tylli ki kompani trai Jylla kita ka Jetz 24×7 bad Anyride kiba la ïoh laisen ban pynrung ïa ki nongñiah ar shaka ban kamai da kaba pyndonkam ïa ka App jong ki.
Hynrei la ïathuh ba kiba bun ki paidbah kiba leit jingleit da ki ar shaka ha kane ka nongbah Shillong, ki dang ïohi ïa ki nongñiah ar shaka kiba kamai ha ka kyrteng jong ka Rapido da kaba pyndonkam ruh ïa ka App jong kane ka kompani. La ong ba ka Rapido kam dei ka kompani na kane ka Jylla bad ym pat ïoh jingithuh na ka Sorkar Jylla.
Ki paidbah kiba tip shaphang kane ki la sdang artatien bad sngew sheptieng namar kam long satia kaba shngaiñ ban shong da ki ar shaka ki bym pat pynrung kyrteng bad kano-kano ka kompani kaba la ïoh laisen na ka Sorkar Jylla.
Shuh shuh la ïathuh ba ka Rapido ka dei kawei na ki kompani kaba pynïaid ïa ki bike-taxi kaba la shah maham ha kiwei pat ki Jylla kum ha Karnataka, Maharashtra bad ha nongbah Delhi namarba kim dei kiba la ïoh laisen. Ha kane ka Jylla, kiba thmu ban pynkamai ïa ki ar shaka ki hap ban bud ïa ki kyndon katkum ka Meghalaya Taxi Aggregator Operation Rules, 2020.
Na ka bynta kawei ka ar shaka, u nongñiah un hap ban siew kum ka bai laisen kaba long T.700 shisnem, katba ka bai permit ka long T.200 shisnem lada ki kamai tang ha ki jaka kiba la batai lypa kum ha nongbah ne district. Hynrei lada kamai ha baroh kawei ka Jylla, ka bai laisen ka long T.1300 bad ka bai permit ka long T.200 shisnem.
Kumta na ka liang ka Sorkar ruh ka la kyntu ïa kiba pynkamai ïa ki ar shaka ba kim dei ban kamai beaiñ hynrei dei ban pynrung kyrteng bad ka tnat Transport jong ka Sorkar Jylla lyngba ki Aggregator kiba la dep ïohi laisen.
Ka jingdon kine ki ar shaka kiba kamai khlem kot khlem sla, ka ktah bad nang pynhiar ïa ka jingkamai ym tang ïa ki taksi kiba ju kamai da kaba siew khajna sha ka Sorkar, hynrei ka ktah ruh ïa kiwei pat kiba pynkamai ar shaka kiba la dep ban pynrung kyrteng bad ki kompani kiba pynïaid ïa ki bike-taxi bad siew ruh ïa ka khajna kaba dei hok ban siew.
