Shillong, Naiwieng 27
Ki katto katne tylli ki tnat treikam ka Sorkar Jylla ki la wanlang ban thaw ki lad kumno ban pynneh pynsah ïa ki tyllong um khamtam namarba ka don ka jingma ïa ki tyllong um namar ka jingbym sumar bad pynjot ïa ki khlaw kiba long ka jingtngen ïa ki jaka ba mih ki tyllong um bad ki wah kiba ju sam umbam umdih sha ki shnong ki thaw.
Ki tnat kiba la wanlang ban ïakren ïa kane ka mat ki kynthup ïa ka tnat Water Resources, Forest, Soil and Water Conservation bad PHE namar ka jingma ka ap ïa ki tyllong bad ki wah kiba la nang ringsdot bad lah ban rngad noh na ka daw ka jingbym ñiewkor ban sumar ïa ki.
La ong ba ka Sorkar Jylla ka la buh ïa kane ka mat hakhmat eh da kaba pynwan lang ïa ki tnat treikam kiba don jingïadei bad ka jingpynneh pynsah ïa ki tyllong um bad ki wah.
La ïathuh ba dang shen na ka liang u Myntri Rangbah u Conrad K Sangma ruh u la lum ïa ka jingïalang jong kitei ki tnat treikam ha kaba la ïashimbynta lang ki Myntri kiba khmih ïa kitei ki tnat ha ka jingdonlang ki ophisar kiba peit ïa kitei ki tnat.
Ha kane ka jingïalang la ïakren ïa ki katto katne ki tyllong um kiba don ha khapsor kiba sam umbam umdih ïa ki jaka ha nongbah Shillong namar ki ruh ki don jingma na ka daw ka jingbym sumar naduh ka jingbret pathar ïa ki jaboh jabaiñ bad pynjaboh ïa ki tyllong um bad ki wah kiba long ki nongpynbiang umbam umdih.
Ha ka jingïalang la ïakren ruh shaphang ki lad ki lynti kiba dei ban shim na ka bynta ban ïada ïa ki tyllong umbam umdih kiba don ha Wahkdait, Laitkor bad ban ïada ïa ka Wah Umkhen kaba dei ka tyllong ban tan um ïa ka South Shillong. La ïathuh ba ka tnat Water Sources mynta kan pynkhreh ïa ki rukom pyntrei ïa ki projek kiba lah ban ïada ïa ki tyllong um ha Jylla baroh kawei lyngba ka jingdonbynta lang kiwei pat ki tnat nalor ka jingdonbynta lang ki paidbah bad ki shnong ki thaw kiba long ki nongïohbynta.
La ong ba kaba kongsan tam ka long ban khanglad ïa ka jingthang khlaw da ki ‘riew dusmon, ka jingthung dieng bad pynneh pynsah ïa ka jingjyrngam ki khlaw sawdong ki tyllong um bad ki wah bad shna ruh ïa ki ‘check dam’ ha ki wah ban pyllang ïa ka um.
