Shillong, Naiwieng 28
Namar ka jingbun ki jingjia aksiden bad ka jingpynher kaba khlemakor jong ki nongñiah ar shaka kaba la ïalam pat sha ka jingmynsaw jong ki nongïaid nongïeng ha ki lynti bad ha ki surok bad ym tang katta, hynrei kaba la ïalam ruh wat shaduh u pud ka jingduhnoh ïa ka mynsiem briew. Kumta na ka liang tnad pynïaid kali jong ka Lumdiengjri Police Station ha ryngkat bad ki pulit Enforcement jong ka tnad Transport hapoh ka jingïalam jong u Ophisar, u Bah H. Pasweth ha ka Sngi Ba-ar jong ka 28 tarik u Naiweing 2023 ki la pynlong da ka jingtalasi ïa ki ar shaka kiba khynthup naduh ki bike bad ki scooty kiba wan lyngba ka thaiñ Upper Shillong kiba thmu ban rung sha ki bynta jong ka Ïewduh bad Garikhana ter ter bad sha kiwei kiwei ki bynta.
Katei ka jingpynlong ïa ka jingtalasi ka dei ruh halor ka jingpeit bniah ban khmih la ki nongñiah ïa ki ar shaka ki don ïa ki Driving License, ki kot ki sla jong ki ar shaka bad ruh kito ba phong da ki slipar bad khamtam ïa kito ki bym bud ïa ka aiñ ban ñiah ar shaka.
Ha katei ka jingbat jong ki pulit, ki la ïoh ban bat palat spah tylli ki ar shaka ki bym don satia ïa ki kot ki sla kiba biang kum ka Insurance, ka Fitness bad kiwei kiwei bad na ka liang ka Enforcement jong ka tnad Transport ki la daiñ kuna naphang ïa ki arshaka khamtam kito ki bym biang ïa ki kot ki sla kum ka dak ban ai jingsneng ïa ki namar ka jingbym burom ïa ka aiñ ñiah kali.
Katei ka jingsdang ban bat jong ki pulit ïa ki ar shaka ka la sdang naduh ka por 11 baje mynstep ha Umshyrpi bad na ka liang ki pulit ki la pynlong ruh ïa ka jingpeit bniah ha kiba bun ki jaka kum ha Mawblei, Mawlai, Laban bad ha Rilbong.
