Shillong, Naiwieng 28
U President ka Syngkhong Rympei Thymmai (SRT) Bah Teibor Khongjee u la ïathuh ba ka jylla Meghalaya kaba dei kaba ai jait sha ka kmie ka dei kaba nynkong hapoh ka thaiñ Shatei Lam Mihngi ban bun ki ban kit khunrei ki kynthei naduh u snem 1991.
U la ïathuh ba katkum ka jingkheiñ ha u snem 1991 kiba bun bha kiba ïa pyllait sanshyieng shikurim ha jylla Meghalaya bad ka bat ruh ïa ka “”kyrdan kaba nyngkong ha ki jylla thaiñ Shatei Lam Mihngi.
U Bah Teibor u la ong ba shisien ba la bun ka jingïapyllait sanshyieng ka jingkit khunrei ki kynthei ruh ka la jur bha namar ki khun kim don kpa shuh.
Shuh shuh u la ong ba naduh u snem 1991 ka Meghalaya ka la wan banyngkong ban ïa phet lok bad mynta haba la ïaid 32 snem ka jingkit khunrei ki kynthei ka la nang jur shuh shuh.
Kumta u la ong ba lada ai jait sha u kpa kan pynduna ïa ki kynthei ban kit khunrei namar u kpa u hap ban bsa ïa ki khun.
U la ong na ka jingai jait sha ka kmie ka jur bha ka jingleh benami namar kum ha Ïewduh wat u CEM ka KHADC Bah Pynïaid Sing Syiem u jemdaw namar ha ka por leit khynrai laisen khaïi ki wan ki kynthei Khasi ban kam ïa kato ka dukan ba shong u khyllah jait.
Ha kajuh ka por u la ïathuh ba ki don ki samla shynrang kiba don ha ka kynhun ai jait sha u kpa kim ïoh lok namar ka kynthei kam treh haba la jur ka jingpyrshah na ïing.
Nalor kane, u la pyntip wat ki missionary na Wales ki la dep hikai ïa u shynrang Khasi ban nym leit phai ïing kur haba u la dep ïathoh.
Namar kata, u Bah Teibor u don jingkyrmen ba lada ai jait sha u kpa kan pynduna ban kit khunrei namar u hap bsa hi u shynrang ïa ki khun.
Ha kajuh ka por ba ki kynthei kiba mynjur ban ai jait kpa lada ki ïoh lok ki hap ban kohnguh ban aiti ïa ka jait lajong sha u shynrang hynrei ha ka seng SRT ki kynthei ban ai jait kpa ki dang don tang da ki spah ngut namar bun kiba la leit phai biang sha kaba ai jait sha ka kmie.
