Shillong, Naiwieng 28
U Dr Mukul Sangma uba dei u nongïalam ka All India Trinamool Congress (AITC) ha Meghalaya u la ong ba kum ki nongïalam hapoh ka jylla, ki sngew ba ka long kaba donkam ban sei kyrtong ha kane ka ilekshon MP ka ban long la shem snem, wat la haduh mynta na ka liang ki nongïalam ka Sengkmie ka TMC kim pat shim rai eiei.
U Dr Mukul u la ong ba ha ka ilekshon MLA kaba dang shu dep, haba phai sha Ri Khasi Jaiñtia, la ïohi ba ka jingïoh vote ka long kaba tlot hynrei ha rilum Garo ka biang bha bad la ïohi ruh ïa ka jingskhem jong ki nongtrei ka seng sha madan.
U la ong ba kum ka seng ka donkam ban ïaid shakhmat ban pynïeng kyrtong bad ha kaba ïadei bad kane, la dep ruh ban pynsngew sha ki nongïalam ba hakhmat. Hynrei kumba ka long mynta, hap ban ap shwa ïa ka rai, naba haba phai sha ka National Level, ki seng saiñ pyrthei bapher bapher kiba don ha ka liang pyrshah ki la dep ban thaw da ka INDIA Block, ha kaba ka TMC ruh ka don bynta lang, bad ha kaba ka jingthmu jong ki seng saiñ pyrthei bapher bapher ruh ka long ba ki kwah ban sei da u kyrtong ïamon lang, ong u Dr Mukul.
Une u nongïalam ka TMC ha Meghalaya, u la ong ba kane ka biang bha, hynrei ka lah ban nym treikam ha ki katto katne ki jaka bad kin don ruh ki jaka ba hap ban pyllait bad kumta la pynsngew ruh ba ïa ka Meghalaya ruh dei ban pyllait ba kum ka seng kan ïoh ban sei ïa u kyrtong ban ïakhun ha ka ilekshon MP.
Haba kylli, u Dr Mukul u la ong ba ka TMC ka dei ka seng kaba ïaid katkum ki riti treikam bad ha kaba ïadei bad ki kyrtong ngi long kiba la don lypa, bad kumta kan nym don jingeh lada hap ban sei kyrtong lada dei ban hap ban ïakhun ruh.
“Kumta, wat la ngi la dep ban pynsngew sha ki nongïalam ba ngi donkam ban sei kyrtong na Meghalaya ha kane ka ilekshon MP, hynrei ïa mynta shipor ngin hap ban ap shwa ban ïoh ïa ka rai,” u la ong.
