Shillong, Naiwieng:
Ka Hynñiewtrep Achik National Movement (HANM) kan pynlong ïa ka Executive Committee ha ka 2 tarik Nohprah 2023 ha shlem treikam jong ka seng ha ka por 1.30 nohphai sngi ban ïakren ïa ka shithi kaba la wan na ka sorkar pdeng lyngba ka Ministry of Home Affairs (MHA) halor ki dorkhas bad ka jingïakhih ba ka seng ka la pynlong ha ka 3 tarik mynta u bnai ha Jantar Mantar, New Delhi.
Ha kane ka jingïalang yn ïakren ruh ban pynthymmai ïa ki komiti bapher bapher kiba don hapoh ka seng, ka komiti ba peit ïa ka khyndew ka shyiap, ka komiti ba dei peit ïa ka kam pisa, ka komiti ba peit ïa ki lad ïohkam ïohjam bad ka komiti ba peit ïa ka jingpynïaid beit hapoh ka seng.
Ha kane ka jingïalang yn ïakren ruh kumno ban pynkhlaiñ ïa ka jingtreikam jong ka Central Executive Committee bad kiwei kiwei ki kam lada don ban ïakren.
Ka phang pdeng jong ka jingïakren ha kane ka jingïalang kan long halor ki ar tylli ki shithi kiba la wan na ka Sorkar Pdeng hadien ba ka seng ka la leit ban ai ïa ki dorkhas bad ka jingïakhih kaba la pynlong ha Jantar Mantar, New Delhi, la ong ka kyrwoh ba la phah da u Bah Venus Rangsliang, Nongaiktien ka HANM Sengkmie.
