Shillong, Naiwieng 28
Ka Petroleum Dealers’ Association of Meghalaya (PDAM) ha ka Sngi Ba-ar ka la ong ba ki heh ophisar jong ki kompeni umphniang bapher-bapher ki la kren shai ba kin pynpoi beit ïa ka umphniang sha ka Jylla wat la hap ban pyndonkam da ki pulit ban synran ïa ki kali naduh jaka ba pynkit ïa ka umphniang.
“Hynne ka step, ki heh ophisar jong ki kompeni umphniang ki la ïakren bad ngi ba kin pynpoi ïa ka umphniang la kumno-kumno bad lada donkam ruh kan don ka jingsynran da ki pulit naduh jaka kit ban pynpoi sha ki jaka theh umphniang. Ki paidbah kumta kim dei ban khuslai ne kulmar jingmut,” la ong u President ka PDAM, Bah Kennedy Khyriem haba kren bad ki lad pathai khubor.
Ki nongñiah bad nongbud ïa ki kali kit umphniang hapoh ka lama North East Petroleum Mazdoor Union, Guwahati, ha ka Lah Sngi U Blei ki la byrngem ban sangeh ban wan sha Meghalaya naduh ka 29 tarik Naiwieng hadien ba ki la kynnoh ba ki la don ki nongñiah bad nongbud ïa ki kali kiba la shah pyndik bad shah bat ha ki pulit ka Jylla ha kine ki khyndiat sngi.
Ha ka shithi ba la thoh sha u Myntri ka tnad sam marbam mardih ka Jylla, u General Secretary ka Union, u Ramen Das, u la ong ba naduh ka 24 tarik Naiwieng, ki pulit ka Meghalaya ki la pyndik ïa ki nongñiah bad nongbud ïa ki trok kit umphniang kiba wan na Assam halor ka jingkynnoh ba ka don ka jingleh shukor ha kaba ïadei bad ka umphniang ha 18 Mer, Ri-Bhoi District.
Haba pyntikna ba ka Sorkar ka la shimkhia halor katei ka bynta, u Bah Khyriem u la ong ba ka seng ka la ïakynduh ïa u Myntri ka tnad sam marbam-mardih bad Myntri ka tnad kam pohïing ka Jylla, ha kaba ki la shimkhia mardor ïa katei ka kam khnang ba ka jingpynpoi umphniang sha ka Jylla kan ïaid beit ïaid ryntih.
Halor ka jingkulmar jingmut jong ki paidbah, u la ong, “Ngi don ka umphniang na bynta ka jingbit jingbiang jong ki paidbah bad haba ngi la tip ïa kane, ngi la pyndap hapoh ki jaka theh umphniang jong ngi bad haba ym ngiam shuh ha ka jaka pynlang ba shapoh khyndew, ngi la pynïeng ruh ïa ki kali khnang ba ki paidbah kin ym mad jingeh haba ïadei bad ka leit ka wan.”
Na ka liang u President u la ïathuh ruh ba kawei-kawei ka jaka theh umphniang ka don ym duna ïa 60,000 litar (na bynta ki jaka theh umphniang kiba rit) bad shilak litar-shilak tam na bynta kiba heh.
“Kat ka jingbun ki jaka theh umphniang hangne, kan neh, nga nym ong katno sngi, katno bnai kan neh…3-4 sngi kan dang neh hynrei ka Sorkar Jylla kan ym shongthait,” u la ong.
Haba pynpaw ka jingsngewsih halor ka jingshah tuh umphniang ha shiteng lynti, u Bah Khyriem u la ong ba ka jingjah umphniang na ka kali kaba lah ban kit 20,000 litar ka long haduh 200-200 litar tam.
“Kane ka dei ka jingduh kaba khraw ïa ngi ki trai jaka theh umphniang,” u la ong.
Na ka liang ka PDAM ka ai ruh ka jingïasnohktilang ïa ka Sorkar Jylla bad ka tnad pulit kaba la kyndang ïa ki jaka bad kem ruh ïa kito kiba don bynta ha ka jingïatuh umphniang ha shiteng lynti na ki kali kit umphniang.
“Ki ong hana ba ka don ka jingshah leh bor jong ki nongñiah, lada don kum kata, ngi ruh ngim kyrshan, hynrei haba kam don kum kata, kaei kaba ngi la ïohi ka long ba ki pulit ki lap bad ki la don ruh ki dur khih ba la ring ïa kaei kaba ki pulit ki la khynra,” u la ong da kaba bynrap ba ka seng kam kynnoh ïano-ïano hynrei ka kyrshan ba ka aiñ kan pynshitom ïa kiba donkti ha kitei ki kam be-aiñ.
Ha ka Sngi Balang, kan don ka jingïalang ha Nongpoh hapdeng ka tnad Pulit, Supply, ki bor distrik (Nongpoh) jong ka Sorkar Jylla lem bad ka North East Petroleum Mazdoor Union ban ïakren halor katei ka mat.
