Shillong, Naiwieng 28
U Bah Comingone Ymbon uba dei u Myntri ka tnad sam marbam mardih ka Jylla u la pyntikna ba kan ym don satia ka jingsangeh pynpoi ïa ka umphniang ‘petrol’ bad ‘diesel’ sha ka Jylla bad kyrpad ïa ki paidbah ba kim dei ban don jingartatien halor kane.
Kane ka jingpynpaw u Myntri ka long hadien ba ka seng ki nongñiah ‘tanker’ ba la tip da ka North East Petroleum Mazdoor Union, ki la byrngem ban sangeh ka jingwan kit ïa ka umphniang kali sha ka Jylla Meghalaya hadien ba ki katto-katne ngut ki nongñiah bad ki nongbud jong ki kali kit umphniang ki la shah rah ha ki pulit ka Jylla halor ka jingkynnoh ba ki trei bym hok ha kaba ïadei bad ka umphniang.
Lah ban kdew ba ki pulit ha ka Sngi Saitjaiñ jong ka taïew ba la dep ki la rah ïa haduh 14 ngut ki briew na Ri-Bhoi District halor ka jingkynnoh ba ki donkti ban tuh umphniang bad die pat ha ka dor kaba tad hadien ba la khleh bad kiwei ki jait um. Namar kane ka jingrah jong ki pulit ba kynthup ïa ki nongñiah bad nongbud jong ki kali, na ka liang ka Mazdoor Union ka la phah da ka shithi ban pynbna ba kan sangeh ka jingpynpoi umphniang kali sha Meghalaya.
Haba kren sha ki lad pathai khubor ha ka Sngi Ba-ar, u Myntri u la ïathuh ba u la ïoh ïa ka shithi lyngba ka ‘WhatsApp’, hynrei u la shimkhia bad bthah ïa u Commissioner Secretary ban khot ïakren ïa ki nongïalam ka Union, ha kaba ki la mynjur ban ïakynduh lashai ka Sngi Balang ha Nongpoh, Ri-Bhoi District bad ha katei ka jingïalang yn don lang ki bor pynïaid distrik jong ka East Khasi Hills bad na Ri-Bhoi District, ryngkat ruh ki nongpynïaid jong ki kompeni pynmih umphniang.
Shuh shuh u Myntri u la ïathuh ba ka tnad ka la pan jingshai na ki pulit halor ka jingrah ïa ki briew ba la shah kynnoh, bad ha kajuh ka por u la ong ba ïa mynta ym pat lah ban ong eiei la ka don shisha ne em kata ka jingleh tuh ïa ka umphniang kali kat bym pat ïoh ïa ka kaiphod ba pura.
Ha kawei pat ka liang, u Bah Comingone u la ong ba kumba ka long mynta ka Jylla kam don jingduna ïa ka umphniang kali (petrol/diesel) bad kyntu ïa ki paidbah ba kim dei ban khuslai namar ka Sorkar kan ïakren ban pyntikna ba kan ym don ka jingsangeh ban pynpoi ïa ka umphniang sha ka Jylla.
