Shillong, Naiwieng 28
Ka TMC kaba don ha ka liang pyrshah ha ka Sngi Ba-ar ka la ong ba ïa ka jingïakren kyllaiñ halor ka mat jong ka jingtih bad shalan dewïong beaiñ, la dei ban sangeh noh bad ba dei ban ujor da ka ejahar bad ban register case namar ki la don bun ki sakhi kiba biang pyrshah ïa ka Sorkar.
“Ym don jingmut ban shu ïakren shi ïakren hynrei dei ban ujor da ka ejahar, ban register da ka case namar lada phi ïaid katkum ka hukum jong ka NGT kaei ba ka hukum ka ong bad mano ba pyntreikam, ka dei ka jingkitkhlieh jong u Chief Secretary bad DGP,” la ong u nongïalam ka TMC Meghalaya u Dr Mukul Sangma haba kren sha ki lad pathai khubor.
U la ong ïa kane haba kynthoh halor ka kaiphod ba dang shen jong u Justice Katakey ba la aiti sha ka ïingbishar High Court kaba ong ba haduh mynta kam shym la don satia ka jingkhang ïa ka jingtih bad shalan beaiñ ïa u dewïong, katba ka sorkar jylla pat ka dang bteng ban kyntait halor kane.
“Ban ïada ïa ka bit ka biang jong ki nongshong shnong bad ka jylla ka shong halor ki bor ba dei khmih, bad mynta halor kine ki jingtohkit ki ban dang wan shuh, yn sa lah ban tip hato ka dei namar ka jingtuklar palat ki briew seng saiñ pyrthei ne hato ka don ka jingïasuh buit ban ailad ïa kum kine ki kam beaiñ,” u la ong.
Haba pynkynmaw ba ka ïingbishar High Court ka la shim suo-moto case, u la ong, “Ka long kumba ïaid hajuh shi hajuh ne kyllaiñ. Hato ngam shym la ïathuh ïa ka pyrthei baroh kawei ba u 32 lak metric ton u dewïong, kaba dei ruh ka jingkheiñ kaba la paw katkum ka jinglap ba la aiti da ka Sorkar Jylla hakhmat ka ïingbishar Supreme Court, mynta um don shuh satia?”.
“U dewïong u la jah. U dewïong un nym lah ban her hi kumto hynrei u la jah pat. Nga la dep ban leit sha kato ka jaka bad ki briew ki la ïakren bad baroh ki tip kaei kaba jia. Nalor kane, haba don ka jingkylla jong ki trok ruh la lap beit da kit dewïong, kaba pynpaw ruh ïa ka kam shalan beaiñ bad kane hi ka kdew ba la ailad hi da ki bor ba dei khmih bad ka daw ma ki hi ki tip kham bha,” la ong u Dr Mukul.
