Jowai, Naiwieng 28
Uwei u nongrep u la mad ïa ka jingsngewsih kthang hadien ba u la duh noh ïa u kba uba la lum la lang ha pyntha rep ba seisoh ha Sung Valley kaba hap hapoh ka Elaka Muskut, West Jaiñtia Hills District.
Ka jingduh noh ïa u kba uba don kumba 27 byrni, ka long hadien ba ki briew ki bym lah satia ban ithuh ki la leit ban thang dusmon ha ka miet jong ka Sngi U Blei ha ka por bym don mano-mano ha katei ka jaka rep.
Kane ka jaka rep ka dei jong u Bah Commander Slong na ka shnong Moodymmai, West Jaiñtia Hills District uba ai nongkhat sha uwei u nongrep na ka shnong Puriang, East Khasi Hills District ba kyrteng u Banehdor Khriam.
Ka khubor ka ïathuh ba une u nongrep hadien ba la dep lum dep lang ïa u kba, u la mih na katei ka jaka rep ban wad kali ban kit noh sha ïing. Kumta hadien ba u la wanphai u la lap pynban ba u kba u la shah thang.
La ïathuh ba na ki 27 byrni u kba uba la julor lada kheiñ kyllum shi byrni un mih 40 haduh 45 kilo bad u symboh kba uba la julor u la kot sha ka jingkhia kaba 800 haduh 1000 kilo.
Halor kane ka jingjia na ka liang u Bah Commander u la dep mudui da ka ejahar sha ki pulit ka Ummulong Beat House. Na ka liang ki pulit ruh ki la hiar sha katei ka pyntha rep ha ka Sngi Ba-ar ban pynlong ïa ka jingtohkit ban lap ïa kiba donkti.
