Shillong, Naiwieng 28
Bun ki jaka ai umphniang kali ha kane ka nongbah Shillong ki la khapngiah bad shlei da ki kali kiba la ïeng laiñ ban ïoh pyndap umphniang hadien ka jingbyrngem ki nongbylla na Assam kiba ñiah bad bud ïa ki kali kit umphniang ban sangeh pynpoi umphniang sha Meghalaya halor ka jingkynnoh ba ki nongbud bad nongñiah kali kit umphniang ki la shah pyndik ha ki pulit Meghalaya kiba la bteng ban khynra ïa ki kali kit umphniang namar ba jur ka jingtuh umphniang ba la pynkit da ki trok kit umphniang bad ka don ka jingkhleh ïa ka umphniang ha ki jaka bapher bapher.
La sakhi ïa kane ka jingtuid ki kali ha ka janmiet Sngi Ba-ar ha bun tylli ki jaka ai umphniang kali ban leit theh umphniang. Kane ka jingkhih khuslai ki briew ka la wanrah ruh ïa ka dheng kali ha kylleng ki bynta jong ka nongbah Shillong.
La sakhi ba ha ki katto katne tylli ki jaka ai umphniang ha Shillong ha kaba ki kali naduh ki ar shaka bad saw shaka ki la tur ban ïeng laiñ ban ïoh pyndap umphniang.
Ha ka jingshisha ki nongïalam jong ka seng ki nongai umphniang ki la pynshai sha ki paidbah ba ym dei ban khuslai wat hadien ba la byrngem ki nongbylla na Assam kiba bud bad ñiah kali kit umphniang.
