Shillong, Naiwieng 28
U Bah Fernando Shangpliang uba dei u muktiar jong u Bah Bless Dkhar, President ka Hynñiewtrep National Youth Front (HNYF) East Khasi Hills District u la ong ba ka jingshah kem jong u Bah Bless ka dei lyngba ka rekod sur kren ba la pyllait da kawei ka lad pathai khubor ha ka 29 tarik u bnai Risaw 2023 kaba la ïohsngew ba u la pan haduh T.1500 na kawei ka trok kit mar.
U Bah Shangpliang u la ïathuh ba u dei utei u briew hi uba la phone ïa u Bah Bless bad u la ong ba ha ka jingsngap ïa ka sur jong utei u briew uba la phone ïa u Bah Bless ym lah satia ban sngewthuh satia ïa ka sur ka jong u.
‘Ha ka jingsngap jong nga, nga la sngap ïa ka sur jong uto u briew ngam lah satia ban kem bad ym sngewthuh mano ba dei hynrei u dei uto u briew hi uba la phone ïa utei u nongïalam kumba la kynnoh ba dei uta u sengbhalang”, la ong u Bah Shangpliang.
Haba kylli la hato ka dei ka jingshisha ba u Bah Bless u la donkti ban khrong pisa beaiñ, u Bah Shangpliang u la ong ba namar ba kadei tang lyngba ka sur kren ym lyngba ka dur khih, ka long kaba eh ban pyntikna halor kata namar ki don shibun bah ki sur bad ym pat lah satia ban pynshisha la u dei ne um dei utei u nongïalam sengbhalang ha katei ka sur kren ba la pynmih hynrei ha ka por ba ki ai jingujor pat ki la pynngat ïa utei u nongïalam sengbhalang.
“Hynrei ban ong ïa kata ka jingkynnoh ba u dei ne um dei ruh, kata ym lah ban ong ba u dei namar halor kane, ka ïingbishar hi kam pat bishar la u dei ne um dei”, la ong u Bah Shangpliang.
U la ong ba ha ka jinsngew ka jong u, u sngew ba ym pat lah ban rai namar ba ka ïingbishar hi hadien ba ka la shim ba kan sa rai, yn sa lap la ka dei ne kam dei ka sur kren jong u Bah Bless.
U Bah Shangpliang u la ong ba baroh artylli ki sur ha katei ka rekod, ym sngewthuh satia bad kim da long shai namar ba ka long tang shiphang bad ka jingkren ruh kam da slem than.
U Bah Shangpliang u la ïathuh ba nyngkong eh ki pulit ki la ïoh por ban tohkit lai sngi ïa u Bah Bless hynrei hadien ba ki pulit ki sngew ba ki dang donkam ban tohkit biang ïa u Bah Bless, kumta ki la pan bor biang na ka ïingkashari sa san sngi hynrei ka ïingkashari ka la ai por tang lai sngi bad baroh ka jingtohkit jong ki pulit ka long hynriew sngi.
Haba kylli biang la hato ki don ne em kiwei kiwei ruh kiba donkti bad u Bah Bless, u Bah Shangpliang u la ong ba halor kata um lah satia ban ong eiei namar ba ka jingtohkit ka dang ïaid shakhmat haduh mynta.
Haba kylli ha kiba kum kiei ki kyndon aiñ la pynngat ïa u Bah Bless, u Bah Shangpliang u la ïathuh ba ki kyndon aiñ kiba la pynngat ïa u Bah Bless ki long hapoh ka kyndon 120 B, 188 bad 384 IPC.
U Bah Shangpliang u la ïathuh ba ka kyndon kaba 120 B ka dei ka jingshah pynshitom na ka bynta ka ‘Criminal Conspiracy’ bad katkum katei ka kyndon ka pyni ba uwei ne arngut ki briew kiba leh ïa ka kam kaba long pyrshah ïa ka imlang ka sahlang ne kiba long beaiñ, ka mut kin ngat hapoh katei ka kyndon.
Katba ka kyndon kaba 188 pat, u Bah Shangpliang u la ïathuh ba ka dei halor ka jingbym kohnguh ne ka jingpynkheiñ ïa ka hukum ba la pynmih da uno-uno u nongtreikam sorkar bad ïa kane lah ban pynrung case da ka ‘Suo Moto Case’.
Katba ka kyndon kaba 384 pat, u Bah Shangpliang u la ïathuh ba katei ka kyndon ka dei halor ka nongrim ban pynshitom ïa kino-kino kiba leh ïa ki kam dawa pisa.
“Kane ka kyndon kaba 384 ka dei beit halor ka nongrim ban pynshitom ïa kito kiba leh ïa kane ka kam dawa pisa”, la ong u Bah Shangpliang.
Haba kylli, la hato kane ka dei ka sien kaba nyngkong ba u Bah Bless u la shah pynngat ha ki kyndon aiñ ne ka la ju jia teng mynshwa, u Bah Shangpliang u la ïathuh ba katkum ka jingtip jong u kum u Muktiar jong u Bah Bless, ka la don kawei ka ‘Case’ kaba u la shimti ma u bad ha kata ka jingjia ruh, u Bah Bless u la shah kem tangba ki dei da kiwei pat ki kam kiba kham rit. Namar kata, u Bah Shangpliang u ngeit skhem ba u Bah Bless un sa ïoh ïa ka jingjop ha katei ka ‘Case’ ruh namar ba ha katei ka ‘Case’ kaba nyngkong, wat na ka liang kiba kynnoh ruh ki la leh donbor ïa u Bah Bless bad na ka liang jong u Bah Bless ruh u la ujor lang da ka ‘Case’ pyrshah ïa kitei ki briew bad ki la ngat lang ha kajuh ka ‘Case’.
“Ym dei tang ma uba shah ai FIR hynrei la ai FIR na baroh arliang bad baroh arliang ki la shah kem lang, bad ki la ngat lang ha kajuh ka ‘Case’ kumba ngat ma u”, la ong u Bah Shangpliang.
U Bah Shangpliang u la ïathuh ba katei ka ‘Case’ jong u Bah Bless ka dei kaba la shah ujor ha thanat Pynursla ha ki snem 2019 lane 2020 eiei bad u la shah kem bad shong patok hapoh shibnai eiei namar ba ka dang dei ka jingjia kaba rit.
Haba kylli pat la hato u Bah Bless un kham shem jingeh ne em ban lait na patok namar ba u dei u briew uba la ju don dak sniew teng, u Bah Shangpliang u la ong ba ka jingshah kem jong u Bah Bless mynshwa bad kane kaba dang shu jia shen kam don jingïadei eiei ruh em bad ym pat lah ban rai pynrem ïa u briew uba la don ka dak sniew teng ba u dei beit uba leh ïa kano-kano ka kam sniew.
“Na ka liang jong ngi ki muktiar ngi ïasaid ïa ka ‘Case’, bad ka dang ïaid bad ngim pat lah ban rai pynrem ïa u briew u ba la don ka dak sniew ba u dei beit u nongleh ïa ki kam sniew hynrei ynda ka ïingbishar ka la rai, hangta ngin sa tip la ka ïingbishar ka rai pynjop ne pynrem ïa u”, la ong u Bah Shangpliang.
U Bah Shangpliang u la ïathuh ruh ba katkum ka ‘Medical Report’, u Bah Bless u don hapdeng ka met ka phad kaba koit kaba khiah.
Kum ban shu pynkynmaw hangne, u Bah Bless Dkhar u la shah kem noh ha ki bor pulit ha ka janmiet jong ka 30 tarik u bnai Risaw 2023 hadien ka jingshah kynnoh ba u la donkti ban khrong pisa beaiñ na ki trok kiba kit palat pud haduh T. 1500 ban pyllait ba kin ïaid lyngba ka jingkieng Damsite haduh Mawlai bad sha kiwei kiwei ki jaka.
Na ka liang ki pulit ka East Khasi Hills ki la kem noh ïa utei u President hadien ba ki pulit nalade ki la ai hi da ka ejahar pyrshah ïa u Bah Bless namar ka jingpynkheiñ jong u ïa ka hukum jong ka ïingbishar da kaba lum pisa beaiñ.
