Shillong, Naiwieng:
Kum shibynta ban rakhe ïa ka jingdap 25 snem jong ka Kur Warjri, ka Seng Kur Warjri ka khot bad ïawer ïa baroh ki parakur ban wan ïashimbynta ha ka Dorbar-bah jong ka Kur Warjri.
Ha katei ka jingrakhe, ka Seng Kur kan sa pynlong ruh ïa ki jingïalehkai bapher bapher khnang ba ka Kur baroh kawei kan ïoh ban ïalehkmen ha ryngkat bad ki para Kur kylleng ka Ri Khasi bad Jaiñtia.
Haba kren sha ki lad pathai khubor ha ka Lah Sngi U Blei, u Bah Sunshine Warjri uba dei u General Secretary ka Seng Kur Warjri u la ong ba ïa katei ka jingrakhe dap 25 snem la ïoh ban plie pyrda ha u snem ba la dep bad yn sa pynkut pat ha ka 12 tarik u bnai Nohprah 2023 ha ka shnong Thynroit ha ryngkat ka jingkhot bad ïawer ïa baroh ki para Kur Warjri kiba kynthup ruh ïa ki Kur War Nongbri, War Tynghah, War Nongjri, War Wahkseh bad ka War Mawnai.
“Ka Kur Warjri jong ngi ka la ïaid lyngba ki snem bad hapdeng baroh kita ki jingïaid lynti, iwei pa iwei i dkhot ki la don bynta ban trei shitom ha ki kam bad ïoh ban kheit ïa u soh jong ka jingkmen”, la ong u Bah Sunshine.
Ka jingrakhe ïa ka lyngkhuh kaba 25 snem jong ka Dorbar Seng Kur Warjri ka la sdang naduh ka Dorbar Kur ba la long ha Sohryngkham mynshem snem ha kaba la ïoh ban pynlong ïa kiwei kiwei ruh ki rong ki taw barabor kum ka jingpyninam ïa ki syntiew, ka thohdur, ka thoh ese bad ka thoh poitri, ka shad ka rwai bad ki rukom lehkai kilan met kum ka kynjatbol bad ka Basketball.
Ïa ka kynjatbol la pynïaid da u Bah Prosperous Warjri bad u Bah Rodson Warjri bad ïa ka Basketball la pynïaid da ka Kong Jeanita Warjri bad u samla Barikupar Warjri.
Ki la don baroh khatar tylli ki kynhun ha ka jingïalehkai kynjatbol na ki shnat Upper Shillong, Wahlang, Manai, Pyndemumïong, Thynroit, Mawphlang, Mawkneng, Siejiong, Pommura-Nongkynrih, Mawlai Datbaki, Urur Rangshken, bad ka Mawprem kiba la shim bynta shitrhem ha katei ka jingïalehkai kaba la long ha ki lai sngi lynter kata naduh ka 21 tarik u bnai Risaw haduh ka 25 tarik u bnai Risaw 2023 kaba la long ha madan Rangshken.
Ha ka Basketball pat, ki la don saw kynhun ki shynrang bad kynthei na ki shnat Mawlai-Laitumkhrah, Wahlang, Mawprem bad Upper Shillong.
Ki lahduh ha ka liang ka kynjatbol ki long ka Manai pyrshah ïa ka Urur Rangshken katba ha ka Basketball ka nam lahduh ka leit sha ka Mawlai pyrshah ïa ka Mawprem na ka liang shynrang bad na ka liang kynthei la ïohrah ïa ka nam jop da ka Mawlai pyrshah ïa ka shnat Wahlang jong ka Seng Kur Warjri.
Nalor ki kynhun nongjop kiba la ïoh ïa ka nam lahduh, yn pynkupburom ruh ïa ki samla ba kynsai ha ka jingtbit ba shimet kum u samla Freddy Fender Warjri na Manai u ba la ïoh ta ka nam lahduh Best Goalkeeper, kiba thep bun kol tam ki long u samla Balajied Warjri na Manai bad u samla Shimbor Warjri na Urur Rangshken kiba la thep mar saw thong, u samla Balajied Warjri na Manai uba la ïoh ïa ka nam kum u riewkilan ba kynsai tam katba u khynnah samla Micky Berth Warjri na Upper Shillong u ba la ïoh ïa ka nam kum u riewtbit ba dang rasong ha ka phutbol.
