Shillong, Naiwieng 29
Hadien na ka liang ki pulit ki la dep ban ithuh bad peitngor, ki 9 ngut ki briew kiba ju mlien ha ka kam khaïi drok bad kiba la shah kem jan man ka por, ki lah ban ngat ha ka saja da kaba shong patok haduh 3 snem khlem bah jamin.
Ïa kane la pyntip da ki nongïalam ka Hynñiewtrep Youths’ Council (HYC) haba kren sha ki lad pathai khubor hadien ba ki la ïoh jingtip na u Myntri ka tnat Social Welfare u Bah Paul Lyngdoh haba ki leit ban ïakynduh ïa u ha ka Sngi Balang.
Ka jingleit ïakynduh jong ka HYC ïa u Myntri ka long ban kyrpad ïa ka sorkar ba kan pynkhlaiñ ïa ki lad ki lynti ban leh da kaba tyngeh ïa ki nongdie drok kiba la jyllei shibun ha kine ki por kiba mynta.
Ka HYC ka la kyntu ruh ïa ka Sorkar ban pyntreikam pura ïa ka Prevention of Illicit Traffic in Narcotic Drugs and Psychotropic Substances (PITNDPS) Act, na ka bynta ban pynsaja ïa kito kiba mlien ban leh ïa ki kam khaïi drok bunsien.
U President ka HYC, u Bah Roykupar Synrem u la ïathuh ba katkum ka jingtip ba ki la ïoh na u Myntri, ki pulit ki la phah haduh 9 tylli ki kyrteng jong ki nongkhaïi drok kiba la shah kem palat ïa ka arsien lane kiba la mlien ban khaïi ïa u drok, bad ka kyrteng kine ki briew yn bishar da ka advisory board ban pynngat hapoh ka PITNDPC Act, kata ba kin shah set patok haduh 3 snem khlem da ïoh jamin.
Na ka liang ka HYC ka la pynpaw ba ym dei tang kita ki 9 ngut kiba mlien ban khaïi manla ka por ïa u drok, bad ka seng ka kwah ba dei ban pynngat ha kane kajuh ka aiñ ïa kiwei ruh kiba mlien ha ki kam khaïi drok namar haduh mynta ym pat lap ban don kiba shah pynshitom tyngeh hapoh ka PITSNDPS Act ba la pyntreikam naduh u snem 1988.
Ha kawei pat ka liang, une u nongïalam ka HYC u la dawa ruh na u Myntri ba ka Sorkar kan thung noh da ki fast-track court ban pynstet ka jingbishar ïa ki briew kiba shah kem ha ki kam khaïi drok, namar kumba ka long mynta ïa ka jingbishar la leh beit da ki district and session judge kiba la khia lypa ka kam kaba pynlong ïa ka jingbishar ban suki.
Ka HYC ka ai khublei ïa ka tnat Social Welfare kaba la sdang ïa ka projek kaba la tip kum ka Drug Reduction, Elimination, and Action Mission (DREAM) ha ka 27 tarik u Jylliew 2023 da ka jingthmu ban pynkylla ïa ka jylla sha ka jylla kaba lait na u drok bad ka ong, ba ka dei ka polisi treikam khlem kano kano ka jingartatien ban pynduhjait ïa ki jingdih kiba sniew bad ban pynlong ïa ka imlang sahlang ban lait na ka jingngop ha ka jingkyrni na ki jingdih ïa kaba baroh ki khmih lynti.
