Shillong, Naiwieng 29
Ka All Khasi Meghalaya Tourist Taxi Association (AKMTTA) ka la kyrpad ïa u Myntri ka tnad kam jngoh kai pyrthei, Bah Paul Lyngdoh ban wanrah noh da ka mat treikam ka ban pyrkhing ïa ki kali Assam ban ïalam kai ïa ki nongwan jngohkai pyrthei sha ki jaka jngoh kai kiba don hapoh ka Jylla.
“Ngi la kyrpad ïa u Myntri ba un khang noh ïa ki kali Assam kiba wan sha ka Jylla ban leit sha ki jaka jngoh kai kum sha Sohra, Dawki nalor kiwei-kiwei ki jaka,” ong u President ka AKMTTA, Bah R. Dohling haba kren sha ki lad pathai khubor hadien ka jingïakynduh bad u Myntri ha ka Sngi Balang.
Ha kajuh ka por, u la ong ba ka seng ka la kyrpad ïa u Myntri ban wanrah noh da ka mat treikam na bynta ki kali kiba wan nabar ka Jylla.
U Bah Dohling u la pynsngew ruh ha u Myntri halor ka jingshah pyndik ki para nongñiah kali kiba ïa kamai lang ha ka thaiñ Police Bazzar ha kaba u Myntri u la pan da ka jingthoh na ka seng halor katei ka bynta.
“Ngi la kyrpad ïa u Myntri ban ong lem ïa ki pulit pynïaid kali ban kham ai por noh, na ka 8 baje sha ka 10 baje ne ban buh lem ka jaka na bynta ki para Khasi kiba ïa kamai na katei ka jaka sha Guwahati,” u la ong.
Haba kylli, u la ong ba ka seng kam shym mut ba nym shah shuh ïa ki kali Assam ban wan ha Shillong, hynrei ki lah ban wan kum ha Nongthymmai, Police Bazzar bad wat haduh NEIGRIHMS.
“Ngi shu kyrpad ïa u Myntri ba un wanrah noh da ka mat treikam ka ban ym shah shuh ban ïalam kai (da ma ki) ïa ki nongwan jngoh kai kiba wan shane kum sha Sohra, Dawki bad kiwei-kiwei ki jaka,” u la ong.
U la ong ruh ba ki nongwan jngoh kai kiba wan sha ka Jylla, lada ki hap ban shong da ka taksi kamai ruh, kin hap ban shong lada ki kwah ban leit sha ki jaka jngoh kai.
Haba jubab, u la ong ba ka seng ha ka dorkhast ba la ai sha u Myntri ka la kdew ruh ïa ka ISBT kum ka jingai jingmut khamtam haba ïadei bad ka jingwan jong kiba bun tylli ki bos Assam khamtam ha ka Sngi Saitjaiñ (kumba 60-70 tylli).
“Ngi la ong ba ban pynduna ïa ka jingdheng kali, ban wanrah noh ïa ka aiñ ba ki bos kin rung beit noh ha ISBT. U Myntri u la ïathuh ba ki la don ki jingïakren bad ka la don ruh ka jaka ba la tyrwa ban pynïeng ïa ki kali kiba wan nabar,” ong u Bah Dohling.
Shuh shuh u President u la bynrap ba ka EC bathymmai ka khot ka wer lang ïa baroh kynthup naduh ki taksi kamai, ki Sumo bad baroh ki kali kamai kiba don ha ka Jylla ban ïadon ryngkat bad ka seng.
“Ngim ong ba ngin thaw ne trei tang kawei ka seng hynrei ngi kwah ba ki ruh kin wan ban ïatreilang bad ngi ha kane ka EC thymmai ba ngi la dep jied,” u la ong.
