Jowai, Naiwieng 29
Ki nongïalam shnong ka thaiñ Narpuh ki la pynpaw ka jingbitar halor ka jingai kaiphod thok da ki heh ka NHAI sha ki bor pynïaid district ha kaba ïadei bad ka surok NH-06 naduh Mynkre shaduh Malidor.
Kane ka wan jia hadien ba ka ophis u Deputy Commissioner ka East Jaiñtia Hills lyngba ka Extra Commissioner ha ka 29 tarik Naiwieng ka la khot ïa ka jingïalang ïa ki Waheh Shnong, Secretary Shnong kiba don ha thaiñ Narpuh na ka bynta ban kyrpad ïa ki ban plie noh ïa ka Toll Plaza kaba don ha Lumshnong namar kane ka jingkhang khyrdep kaba la neh 3 bnai mynta ka la ktah jur ïa ka jingïoh ka NHAI.
Hynrei na ka liang ki Waheh Shnong kiba wan sha kane ka jingïalang ki la pyneh triang ban ym plie da lei lei ïa kane ka Toll Plaza kaba don ha Lumshnong katba ka NHAI kam pat lah ban maramot bad siang rong ne blacktopping ïa kane ka surok NH-6.
Ki nongmihkhmat na ka liang ka NHAI ki la ai ïa ka kaiphod thok sha ka Extra Commissioner ka East Jaiñtia Hills ha ka jingïadei bad ka jingmaramot ïa kane ka surok NH-6 bad ki la kam ba 80% la dep maramot ïa ka surok.
Ki nongïalam shnong kiba don ha kane ka jingïalang ki la pynpaw ka jingbitar ïa ki heh jong ka NHAI namar ka jingthok jingshukor jong ki namar ki kontraktor kiba pyntrei ïa ka surok NH-6 haduh mynta tang 10% ruh ki khlem lah ban pyndep ïa ka black topping.
Kumta na ka liang ki nongïalam shnong kiba don ha ka jingïalang ki la pynpaw ha ka Extra Commissioner bad sha ki heh jong ka NHAI ba lada kim lah ban pyndep ïa ka black topping haduh 80-90% kin ym ailad da lei lei ban plie ïa kane ka Toll plaza kaba don ha Lumshnong.
Namar kata, ki la kyntu ruh ïa ki bor pynïaid district ka East Jaiñtia Hills ban ym ngeit ïa kane ka kaiphod jong ka NHAI bad nangne shakhmat ki dei ban pan ïa ka kaiphod na ki nongïalam shnong ka Narpuh haba ïa dei bad ka jingsiang rong ïa ka surok NH-6 naduh Mynkre haduh Malidor namar katkum ka jinglap ba ki heh ka NHAI kiba peit ïa ka surok ki ai da ka kaiphod thok sha ki bor pynïaid district.
