Nongstoiñ, Naiwieng 29
Ka synjuk ki nongñiah trok kaba la tip kum ka Meghalaya Commercial Truck Owners & Driver Association (MCTODA) ka la shim ïa ka rai ban bthah ïa ki dkhot ba kim dei ban siew khajna ha kano-kano ka khyrdop katba ym pat ïoh jingshai na ka ‘working plan’ jong ka KHADC.
Ïa kane la ong da u Bah Peter Marbaniang, Secretary ka MCTODA haba kren sha ki lad pathai khubor hadien ka jingïalang kaba la long ha ka 29 tarik u Naiwieng, ha kaba ka MCTODA ka la lum ïa ka jingïalang ha Nongstoiñ ban ïakren bad pynshai sha ki dkhot halor ka jingïakren jong ka seng bad u CEM ka KHADC myn ha ka 24 tarik u Naiwieng.
Shuh shuh u Bah Marbaniang u la ong ruh ba kane ka jingïalang ka long ban pynshai sha ki dkhot halor ka jingïakren jong ka seng bad u CEM ka KHADC.
U Bah Suborson Rangslang, Working President ka seng u la ong, ka jingïakren jong ka seng bad ka KHADC ka la ïaid la palat 2 snem hynrei haduh mynta ym pat ïohi ïa kata ka working plan, kumta ka seng kan nym treh ban phah siew khajna ïa ki dkhot ha kino-kino ki khyrdop kiba don hapoh ka Bri u Hynñiewtrep namar ba kam pat shai ka dor kam da tikna bad ka KHADC kam dei ban buh bun kajuh ka khyrdop ha man la kawei-pa-kawei ka district.
