Shillong, Naiwieng 29
Ha kane ka pyrthei kyrduh kam bun na ki samla pule ki shu shong ha ïing hadien ba ki la pyndep ïa ka jingpule bapher bapher. Hynrei haba ngi phai sha kawei longkmie ka bym ïoh leit skul naduh dangrit namar ka jingban ka jingduk kaba sah ha jingkieng Myntdu, Jowai, West Jaiñtia Hills District ka la pyni ïa ka nuksa kaba bha tam sha ki samla ha kane ka juk kaba mynta ba ki dei ban trei shitom khnang ban lah pyndap pynbiang ïa ka ïing ka sem.
Ka Kong Sibor Pakynteiñ, 56 snem ka rta, kaba don saw ngut ki khun kam shym la ïoh ban leit skul naduh dangrit ha ka por ba ka sah ha shnong Demthring, Jowai namar ka jingban ka jingduk. Kane ka longkmie ka la kyrshan ïa ka ïing da kaba leit ap masi ha ka por mynsngi haduh saw snem kynthih. Kumta katba dang ïaid ki snem haba ka la kynjoh sha ka rta kaba 12 snem, ka kmie jong ka Kong Sibor ka la ïalam noh ïa ka sha Jowai ban shong die dukan ha Ïawmusïang kaba la ïai bteng haduh mynta ban kynjoh shaduh 44 snem ban bylla da kaba shong dukan.
Ka Kong Sibor kaba sah mynta ha Jingkieng Myntdu, Jowai kam nang ban kren ki ktien nongwei namar kam shym la leit skul. Hynrei naduh ba la pynpra ïa ka Ïawmusïang ka la wan shong die dukan ha Ladthadlaboh pyrshah ka Kiang Nangbah College, Jowai kaba la ai kyrteng S. Pakynteiñ Food and Tea Stall Catering Services. Dei hangne ba ka kam bylla jakpoh ka la sdang ban ïeng rasong haduh ba ka la lah ban long pynban ka nong shet-ja shet jyntah ban pynbiang ha ki jaka khawai dawai lada ki briew ki shu wan shim wai.
Namar ka jingbang bad ka jingsbun mynsiem ka trai dukan baroh ki briew na Jowai kiba dei ki ophisar, ki nonghikai, ki nongmihkhmat paidbah, ki draibar kali bad ki samla pule ki la rung ban bam ha kane ka dukan.
La ïohi ba wat ki draibar kali kamai ha Jowai ki hap ban shong bam hapoh kali namar hapoh dukan la khapngiah bym dap shuh jaka ban shong.
Kaba sngewphylla ka long ba ka tungrymbai kaba la shet da ka Kong Sibor, ki kmie ki kpa ki ju rah shaduh China ban phah bam ïa ki khun kiba leit pule doktor kat haduh ba ki samla kiba pule doktor ha China ki la ïoh ban mad lang ïa ka tungrymbai na Jowai.
Ka Kong Sibor haba ka la kham noh ka karta, ka la sdang ban aiti ïa ka kam sha ar ngut ki khun kynthei ba kin shet kin tiew bad kin shong ha kane ka dukan khnang ba kin long ma ki, ki ban shimti hadien habud.
