Panaji:
U tyngshop ki phlim Hollywood u Michael Douglas ula ai jingiaroh ia u Myntri Rangbahduh ka India u Narendra Modi halor ka jingnoh synñiang jong u ha kaba iadei bad ka Indian Cinema ha kaba nalor kane u Micheal ula iaroh ruh ia u Anurag Thakur kiba la shim bynta ban kyntiew ia ka kam pynmih phlim ha kane ka ri.
Ha ka jingwan shim bynta ha ka 54th International Film Festival kaba la long ha Goa, u Micheal uba la shah pynkup burom da ka Satyajit Ray Excellence in Film Lifetime Award ula ai jingiakren halor ka jinglah ban khring ki phlim na India ia bun ki nongshong shnong jong ki ri ka pyrthei bad sngew ba ka jingiatreilang jong ka sorkar ka dei ruh kawei kaba la pynkiew sted bha ia ka kam shna bad pynmih phlim jong kane ka ri.
Shuh shuh nalor kane u Micheal ula ai jing iaroh ia ka jinglah ban khring ka IFFI ia ki ri ka pyrthei bad kmen ban iohi ba haduh 78 tylli ki phlim na kylleng ki ri ki ioh ban shim bynta lang ha kane ka tamasa.
U Micheal kum u khlur ak phlim ula pynpaw ba dei ruh lyngba ki phlim ba lah ban pyniakynduh lang ia ki briew ha ki rynsan khlem da kheiñ ba ki dei na ka jaitbynriew aiu, na kano ka niam bad na kiwei kiwei de.
Ka International Film Festival of India (IFFI) kaba la pynlong naduh ka 20 haduh ka 28 u Naiwieng la plie paidbah da ka phlim jong u Aparshakti Khurana bad la pyniaid ia ka da ka Karishma Tanna bad ha kajuh ka por la pynlong ia ka ha Shyama Prasad Mukherjee Indoor Stadium.
Napdeng ki khlur ak phlim kiba la wan shim bynta ha kane ka tamasa ki kynthup ruh u Shahid Kapoor, Madhuri Dixit, Shriya Saran, Nushratt bad kiwei kiwei.
