Shillong, Naiwieng 29
Ka sorkar India, sorkar Manipur bad ka United National Liberation Front (UNLF), ka seng kieng atiar kaba la rim tam ha Manipur, ki la ïasoi ïa ka soskular jingsuk (Peace Agreement) ha nongbah New Delhi ha ka Sngi Balang.
Ha u kyrwoh khubor, ka sorkar India ka la ong ba kane ka soskular kan nang wanrah shuh-shuh ïa ka jingsuk ha ka thaiñ Shatei Lam Mihngi bad khamtam ha Manipur.
La seng ïa ka UNLF ha u snem 1964 bad ka la treikam hapoh bad shabar u pud u sam jong ka Ri India.
Ïa katei ka soskular la soi hapdeng ki heh ka tnat Korbar Ri ka sorkar India, ki heh na ka sorkar Manipur bad ki nongmihkhmat ka seng UNLF.
Haba kynthoh halor katei ka soskular, u Myntri Korbar Ri, u Amit Shah, u la ong ba katei ka soskular ka long u mawjam bakongsan. U la ong ruh ba ka long ka sienjam ban pynurlong ïa ka jingangnud jong u Myntri Rangbahduh, u Narendra Modi, na ka bynta ban wanrah ïa ka roi ka kiew bad ka lawei kaba kham bha na ka bynta ki samla ka thaiñ Shatei Lam Mihngi. U la ong ba u pdiang sngewbha ïa ka UNLF sha ka rynsan jong ka jingsynshar paidbah bad u la kitbok kitrwiang ruh ha ka jingïaid jong ki ha ka lynti jong ka jingsuk.
Naduh u snem 2014 bad haduh mynta, ka sorkar India ka la ïasoi ïa kiba bun ki soskular bad ki seng kieng atiar bapher-bapher kiba don ha kane ka thaiñ. Ka dei ruh ka sien banyngkong ba ka kynhun kieng atiar na them jong ka Manipur ka la mynjur ban iehnoh ïa ki kam ïaumsnam bad ban wanphai sha ka imlang-sahlang da kaba burom ïa ka Riti Synshar bad ki aiñ ki kanun jong ka Ri.
Hadien ba la soi ïa katei ka soskular, yn sa thaw ruh ïa ka Peace Monitoring Committee (PMC) ka ban peit ïa ka jingpyntreikam ïa ki kyndon jong ka soskular.
