Shillong, Naiwieng 29
Ka Hynñiewtrep Youths’ Council (HYC) Sengkmie lyngba ka Socio Cultural Cell kan pynlong da ka tyrko nia lyngkot halor ka phang “Ka jingai jait kpa ki katto-katne ngut ki khun hynñiewtrep ka pyntroiñ ïa ka jaidbynriew”.
Haba pyntikna ïa kane, u Bah Joplang Kharnaïor uba dei u Secretary ka Socio Cultural ka HYC u la ïathuh ba lada ai jait sha u kpa kan wanrah ka jingïapra shi ïing shi sem hapdeng u kpa bad ka kmie.
U la ong ba ka tipkur tipkha kan pynïatylli ïa ka jaidbynriew haba dang ai jait sha ka kmie hynrei lada ai jait sha u kpa ka tipkur tipkha ka la jah noh.
U la ong ruh ba ki samla ne rangbah ki lah ban shimbynta ha kane ka tyrko nia ka ban kut ha ka 4 tarik Nohprah 2023.
Nalor kane, u la ïathuh hadien ba ki la phah ïa ki dur-khih (video) yn thep ha YouTube Channel ka HYC. Ïa ki nongjop yn sa sam ha ka 6 tarik Nohprah 2023 ha shlem treikam ka seng kaba dei ka lyngkhuh sngi khlad ka Phan Nonglait.
Ka khusnam ïa ki nongjop ba nyngkong yn ai T. 10,000, ba wan ba ar T.7000 bad ba lai T. 5000.
U Bah Joplang u la pyntip ba ka jingpynlong ïa kane ka jingïakob tyrko nia ka dei namar ka jingpyrkhat jong kiba ai jait kpa ka la ïapher, kumta ban pynïap nia, ka HYC ki samla kin mih shakhmat ban pyni ïa ki nia halor ka nongrim haba ai jait kmie.
Kum ban shu pynpaw ba ha kine ki khyndiat sngi, u President ka Syngkhong Rympei Thymmai (SRT) Bah Teibor Khongjee u la ïathuh ba kiba ai jait kpa tang ki Khasi Jaiñtia ki la poi san hajar ngut bad kynthuplang ki bym rung dkhot ha ka SRT ki la poi palat sanphew hajar ngut.
