Nongpoh, Naiwieng 29
Ha kawei ka jingjia ha ka miet sngi Ba-ar, uwei u nongbud jong ka trok u la khlad noh ha shen katba u nongñiah pat u la mynsaw jur hadien ba ka trok kaba ki shong ka la leit ban noh sha ka riat bah ha ka jaka ba long khongdong surok ha surokbah National Highway kaba dang hap ha ka shnong Shangbangla ha Ri Bhoi District.
Katkum ka khubor ba la ïoh lum, la ïathuh ba katei ka trok kaba don ïa u number WB91-8529 ka la leit ban hap sha katei ka riat ha ka por kumba 10 baje eiei mynmiet hadien ba ka la don ka jingthut jong ka brake kaba la pynlong ïa u nongñiah ba um lah shuh ban tehlakam ïa u steering jong ka kali kaba u ñiah.
Kumba katei ka jaka ka dei kaba shait jia bunsien ki jingjia tyngkhuh kali namar ka jinglong khongdong jong ka surok bad katto katne ki dukan kiba don ha katei ka jaka ki la shah rat ha katei ka jingjia. Ha kawei ka liang kam shym don satia pat ka jingmynsaw naba ka dei ka por ba kitei ki nongshong dukan ki la dep khang ïa la ki dukan.
Ki pulit ka Ri Bhoi District hadien ba ïoh jingtip halor katei ka jingjia, ki la leit hiar mar-mar sha katei ka jaka bad pynkit noh ïa u nongñiah uba la mynsaw sha Civil Hospital Nongpoh hynnin hi ka miet ha ka por kumba 11 baje eiei katba ïa u nongbud uba la khlad noh ha shen, la ïoh ban sei pat ïa ka met ka jong u mynta ka step bad la pynkit noh sha Civil Hospital Nongpoh na ka bynta ban pyndep ïa ka eksamin post-mortem. Na ka liang ki pulit ki dang pynlong ïa ka jingtohkit halor katei ka jingjia.
