Mumbai:
Hadien ka jingshah byrngem biang u Salman Khan ha u Lawrence Bishnoi ki pulit ka Mumbai ki la shim khia ban kham pynjur shuh shuh ki bor pahara ia une u tyngshop ha kaba la bunsien u Lawrence ula byrngem ban shim ia ka jingim u Salman.
Kane ka jingbyrngem kaba mynta ka la pynlong ia ki pulit ka Mumbai ban ym nud shuh ban kheiñ sting naba ki la iohi ia shibun ki kam runar kiba u Lawrence bad ki nongbud jong u ki la leh ia ki katto katne ngut ki briew.
Dang ha kine ki khyndiat sngi ki kynhun u Lawrence Bishnoi ki la leit thombor ia ka iingsah u Gippy Grewal kaba don ha Canada da kaba kynnoh ba u Gippy u dei uba don ka jingiadei ba iajan bha bad u Salman bad kane ka jingshah thombor ka iing u Gippy ka la pynlong ia ki pulit ka Mumbai ban kham pynbun shuh shuh ki lad jingiada ia une u tyngshop ban lait na ka jingma.
U Lawrence Bishnoi ula maham tyng eh ia u Salman bad ong ba une u tyngshop un ym lait satia na ka kti jong u bad ha kajuh ka por ula pynkynmaw ruh ia u Salman ia kaei kaba ula leh ia u Sidhu Moosewala.
Dang ha u bnai Jylliew u Salman ula shah byrngem ha u Lawrence Bishnoi ha kaba la pyrkhing bha ki lad pahara ia une u tyngshop bad ha kajuh ka por la khang ruh ia ki briew ba kin iakynduh mar khmat bad une u tyngshop.
