Shillong Naiwieng 29
U Bah Sanbor Shullai uba dei u MLA ka BJP u la ong ba na lade shimet hi um don jingmut shuh ban ïakhun ïa ka ilekshon MP, hynrei lada ki nongïalam ki kwah, un nym kyntait pat.
Lah ban pynkynmaw ba u Bah Sanbor u la ïakhun teng ïa ka ilekshon MP ha u 2019 bad u la wan ha ka kyrdan kaba lai hadien ba u la ïoh 75 hajar tam eiei ka vote.
Haba kren bad u nongthoh khubor, u Bah Sanbor u la ong, kumba ka long mynta hi um don mon ne jingmut eiei ban ïakhun hynrei kan shong pat ha ka rai jong ki nongïalam, ba lada ki kwah ban pynïeng ïa nga, ngan nym lah ban kyntait hynrei hap ban kohnguh.
“Wat ha ka ilekshon MP ha u 2019 ruh ngam shym la don satia kata ka jingkwah ne jingmut ban mih madan, hynrei ki nongïalam ka BJP pat ki la jied da ka kyrteng jong nga, kata ruh tang lai taïew eiei shwa ka ilekshon. Wat la nga la sngewthuh ba kan long tang ka jingïakhun bad ngan nym poi sha ka thong, hynrei namar ba kum u dkhot ba bud ïa ki kyndon treikam bad sngewrit, ka la pdiang bad ban leit thep kyrteng,” la ong u Bah Sanbor.
“Kumta, lada ha kane ka kynti kaba mynta ruh lada wan ka jingbthah na ki nongïalam, ngan nym kyntait. Hynrei na lade hi ngan nym pan tiket satia namar ngam don jingthmu satia ban mih ïakhun ïa ka ilekshon MP,” u la ong.
Ha kawei pat ka liang, u Bah Sanbor u la ong, ka jingpynbna kyrtong slem jong ka BJP ka buh jingeh bad jynjar bha ban treikam namar kan bam por shibun ban leit ïalap ha ki 36 tylli ki konstitwensi, ha kaba u la ong ruh ba ïa u kyrtong la dei ban pynbna kham kloi lada long hynrei 6 bnai shwa ka ilekshon.
Shuh shuh u Bah Sanbor u la ong, ba na ka liang jong u, um don jingtip satia ba haduh katno ngut ki don kiba la pan tiket na ka BJP, hynrei haduh mynta u dang ïohi tang ka kyrteng jong u Bah A.L Hek, Myntri Sorkar uba dei ruh u MLA ka Pynthorumkhrah, kaba la mih ha ki lad pathai khubor.
