Los Angeles:
Ka Jennifer Lopez ka la pynbna ba ka thup thymmai kaba la ai kyrteng ‘This is Me… Now’ yn pyllait paidbah sha ki rynsan haduh u Rymphang 2024 ha kaba kane ka nongrwai kaba la don 54 snem ka la iathuh ruh ia ka sngi ban pynmih ia kane ka thup ka ban long ha ka 16 tarik.
Ka ‘This is Me… Now’ kan dei ka thup kaba la mih hadien jong ka ‘This is Me… Then’ kaba la pynmih ha u 2014. Ha ka thup ‘This is Me… Now’ ki jingrwai kin dei ki Pop, Hip-Hop bad R&B.
Hynrei ha shwa ka jingpynmih bad jingpyllait paidbah ia katei ka thup thymmai ka JLo kan sa pynmih ruh ia ka jingrwai “Can’t Get Enough,” ha ka 10 tarik u Kyllalyngkot.
