Shillong, Naiwieng 29
U Myntri Rangbah u Conrad K Sangma u la lum ïa ka jingïalang jong ka tnat PWD lem bad ki briew ka NHIDCL ha kaba la ïakren shaphang ki katto katne tylli ki projek kynthup ka surok Shillong-Dawki kaba la sahteng.
Ha kane ka jingïalang la donlang u Symbud Myntri Rangbah u Bah Prestone Tynsong lem bad ki ophisar ka Sorkar Jylla bad ki briew ka NHIDCL.
U Conrad u la ong ba haba ïadei bad ka projek Shillong-Dawki, ka don ka bynta kaba hap maramot noh ïa ka surok kaba la sniew bad ki don ruh ki bynta kiba hap sdang pyntrei noh biang kaba hap ha ka package-I.
U la ong ba ka work order na ka bynta ka package-1 la dep ai sha uba dei ban pyntrei bad yn shen yn sdang noh kum ka bynta na Umshyrpi sha Upper Shillong kaba la sahteng baroh shikatta.
U la ïathuh ba ki don ruh ki jaka kiba hap phikir bha haba pyntrei namar ka jinglong ka jaka naduh ka jingpynpoi ïa ki tiar ki tar bad ruh ki kali kiba donkam ban wan ki long kiba kham saja.
