Nongpoh, Naiwieng 29
Ka North East Petroleum Mazdoor Union (NEPMU) ka la rai ban pynsangeh noh ïa ka jingthmu ïakhih da kaba sangeh pynpoi ïa ka umphniang petrol bad diesel sha Meghalaya.
Kane ka jingweng noh ïa ka jingthmu ïakhih ka la long hadien ba ki bor sorkar ka jylla Meghalaya lyngba ka tnat Food Civil Supplies and Consumer Affairs ha ka Sngi Balang ki la pynlong ka jingïalang kyrkieh bad ki nongïalam ka NEPMU, kata hadien ka jingmih ka khubor hamsaïa ba ka NEPMU kan sangeh kit umphniang petrol, diesel bad LPG sha ka jylla Meghalaya.
Ka jingmih jong kane ka khubor hamsaïa ka la pynlamwir shikatdei ïa ki paidbah ka jylla khamtam ha nongbah Shillong, ha kaba la ïohi bun ki kali ki la leit tur sha ki jaka thep umphniang na ka jingtieng ïoh lehse kan don shisha kata ka jingsangeh ban pynpoi umphniang sha ka jylla.
Kum ban shu pyntip khyndiat, ka jingbyrthen jong ka NEPMU ban sangeh kit umphniang sha Meghalaya ka dei hadien ka jingkhynra jong ki bor pulit ka jylla ïa ki jaka tuh umphniang ha shilynter jong ka surok bah National Highway 6 ha kaba na ka liang ka NEPMU ka la kynnoh ba ka la don ka jingleh tohmet jong ki pulit pyrshah ïa ki katto-katne ki nongñiah bad nongbud jong ki kali kit umphniang ha katei ka jingkhynra kaba la pynlong ha ka 24 tarik mynta u bnai.
Ha ka jingïalang ba la pynlong ha Circuit House Nongpoh, la mihkhmat ïa ka jylla da u Commissioner & Secretary u Pravin Bakshi ban ïakren bad ki nongïalam ka NEPMU, ki nongïalam ka Petroleum Dealers Association of Meghalaya (PDAM), Meghalaya Indane Distributor Association (MIDA), ka IOCL, BPCL & HPCL lem bad ki ophisar na ki district ka East Khasi bad Ri Bhoi District bad ruh ki pulit na Ri Bhoi bad East Khasi Hills District.
Haba kren sha ki lad pathai khubor hadien ka jingïalang, u Pravin Bakshi u la pynpaw ka jingsngewnguh sha ki nongïalam ka NEPMU bad kiwei kiwei kiba ïadon bynta lang ha ka jingïalang kiba la wan shakhmat ban ïakren bad weng ïa ki jingeh kumba la pynpaw da ki nongïalam ka NEPMU.
U la ïathuh ruh ba ka jingïalang ka long kaba seisoh bad kaba sngewtynnad ha kaba na ka liang ka sorkar jylla, kan ai ïa ka jingkyrshan ïa ka jingdawa ki nongïalam ka NEPMU ban pynbiang ïa ka bai nongtrei bad ruh kiwei kiwei ki jingmyntoi ba ki dei hok ban ïoh kum ka EPF.
Ha kaba ïadei bad ka jingkynnoh tuh umphniang, u Pravin Bakshi u la ong ba ha ka jingshisha kum kine ki kam buit tuh kim dei satia ban jia bad dei halor kane ka bynta ba ki pulit ki la pynlong ka jingkhynra bad kumba ki pulit ki la leh ïa la ka kamram, u la ong ba kam dei pat ban buh jingeh ïano ïano kiba leh ïa la ka kam. U la ong ruh ba um don eiei ban kren halor ka jingkhynra jong ki pulit, naba ka jingtohkit halor kane ka jingkynnoh tuh umphniang da ki katto katne ka dei kaba dang ïaid shakhmat.
Ha kajuh ka por u Bakshi u la kyntu ruh ïa ki nongïalam ka NEPMU ba kin weng noh ïa ka jingsangeh pynpoi umphniang sha ka jylla Meghalaya bad pynshai ruh sha ki paidbah ba kam don satia ka jingduna umphniang ha ka jylla bad ba ki paidbah kim dei ban long lamwir halor kane ka bynta naba ka umphniang ka don byllai hapoh ka jylla.
U General Secretary ka NEPMU, u Ramen Das haba kren sha ki lad pathai khubor u la pynpaw ka jingkhublei kyrpang ïa u Pravin Bakshi halor ka jingpynlong ïa kane ka jingïalang ban ïatai halor ka jingeh kaba kum ki dkhot ka seng ki ïakynduh.
U Ramen Das u la ong ruh ba ka jingkhot ban sangeh kit umphniang sha ka jylla Meghalaya kam pat sdang satia bad ka dei tang ka jingsngewthuh bakla, da kaba pynshai ba na ka liang ka NEPMU ka shu ai da ka jingthoh sha ka tnat Food Civil Supplies and Consumer Affairs ka jylla bad ong ruh ba um tip kumno kane ka shithi ka lait sha ki paidbah.
Ha kajuh ka por, u Ramen Das u la ong ruh ba na ka liang ka jong u lem bad kiwei ki nongïalam ka NEPMU kin sa leit phai biang sha nongbah Guwahati ban ïakren halor kane ka bynta bad ïathuh ruh ba hapoh ki khyndiat kynta kin sa ai ïa ka jingthoh kaba sngewtynnad sha ki paidbah ka jylla ba la weng noh ïa katei ka jingkhot sangeh kit umphniang sha ka jylla Meghalaya.
U Bah RL Blah, President, MIDA bad u Bah Kennedy Khyriem, President jong ka PDAM ki la pynpaw shai sha ki nongïalam ka NEPMU ba kim don satia kano kano ka daw pyrshah ïa ki, hynrei ka jingthmu ka jongki ka long ban pynduh ïa ka jingtuh umphniang ha shilynter ka surok bah National Highway 6 kaba wanrah ïa ka jingduhnong ïa ki kum ki nongshalan umphniang ha ka jylla.
Ki la pynpaw ruh ïa ka jingkyrshan pura ïa ki pulit ka jylla halor ka jingkhynra bad ong ruh ba kito kiba leh ïa ki kam tuh kam thiem ki dei ban shah pynshitom katkum ki bor jong ka aiñ. Ki la pynshai ruh ba ki paidbah kim dei satia ban khuslai ban thied umphniang naba kam don satia kano kano ka jingkyrduh umphniang lane wat ki LPG ruh hapoh ka jylla.
