Shillong, Naiwieng 30
Ka Sorkar Jylla ka la buh sngi ban pynlong ïa ka jingïalang bad ki nongïalam ka Harijan Panchayat Committee (HPC) ha ka 7 tarik u Nohprah, 2023 na ka bynta ban ïakren pynbeit noh halor ka mat kaba dang sahteng ban pynkynriah ïa ki briew ba shong ba sah ha Sweepers’ Colony na Them Ïew Mawlong sha kawei pat ka jaka.
Haba kren sha ki lad pathai khubor ha ka Sngi Palei, u Symbud Myntri Rangbah ka Jylla u Bah Sniawbhalang Dhar uba khmih ruh ïa ka tnat Pynroi Sor u la ong, “Ngi la dep ban pynbeit ban don ka jingïalang bad ki nongïalam ka HPC ha ka 7 tarik Nohprah.”
U Bah Sniawbhalang u la pynpaw ruh ka jingsngew skhem ba baroh arliang ki kynhun kin sa lah ban pynbeit noh ïa ki mat ha kane ka jingïalang bad ong ruh ba katkum ka jingpaw, imat ïa kane ka mat lah ban pyndep noh ha une hi u snem hynrei kaba kongsan ka long ban ïakynduh shwa ha shwa ban shim ïa ka rai kaba khatduh.
Haba kylli, u Symbud Myntri Rangbah u la ong ba na ka liang jong ka HPC ka la kyrpad ïa ka sorkar ban wanrah katto katne ki jingpynkylla ha ka saiñdur ne ‘blueprint’ ïa kaba la pynkhreh bad pynbit pynbiang da ka sorkar jylla.
“Namarkata, ngi na ka liang ka sorkar ruh ngi dang ïaleh kumno ban pynbit pynbiang ha kata ka rukom kaba dei khnang ba ngin lah ban pyndep bad pynkut noh ïa kane ka mat,” la ong u Bah Sniawbhalang.
Katkum ki tyllong khubor, la ong ba ha katei ka jingïalang ban long ha ka 7 tarik, yn wan ban ïashimbynta da ki nongïalam ba hakhmat ka HPC ha ryngkat ka jingïadon lang ki nongïalam jong ka Gurudwara na Delhi bad ki nongïasaid aiñ jong ka HPC, u Advocate General ka sorkar jylla bad ki heh ophisar na ki tnat sorkar bapher bapher.
