Shillong, Naiwieng:
Ka tnat Social Welfare ka Sorkar Jylla ka la ïatai sani ha ki ar sngi lynter haba ïadei bad ki jingeh kiba mad ha ka jingai jingshakri bad kumno ban shim ki lad ban pynbha ïa ka rukom treikam naduh ka jingpyntreikam ïa ki skhim kiba wan lyngba kane ka tnat.
Ïa kane ka jingïalang kaba ar sngi la pynlong ha State Convention Centre ha kaba la wan ban ïashimbynta da ki spah ngut ki ophisar ha ka jingdonlang u Myntri ka tnat Social Welfare u Bah Paul Lyngdoh lem bad ki heh ophisar kane ka tnat.
Haba kren sha ki lad pathai khubor ha ka Sngi Ba-ar, u Bah Paul u la ong ba shibun ki mat la ïatai ha kane ka jingïalang kaba ar sngi lynter bad shim ruh katto-katne ki rai kiba donkam.
U la ong ba kane ka jingïalang ban khmih bniah ïa ki jingeh bad jingdonkam hapoh ka tnat la pynlong biang hadien ba la pud snem naduh u snem 2019.
Ha kane ka jingïalang la khmih ruh shaphang ka jingpyntrei ïa ki skhim hapoh ka tnat Women and Child Development ka Sorkar Pdeng, ki skhim na ka bynta ki SC bad ST nalor kiwei kiwei.
Kaba kham banjur eh ka dei halor ka jingbym biang ka rukom treikam bad buddien ïa ki skhim kiba sahkut bad ki tnat treikam bapher bapher ka Sorkar Pdeng ha kaba la sngew donkam ban buh da ki briew kiba don jingtip bha ban pynbiang ïa ki jingdonkam bad ïakren bad ka Sorkar Pdeng.
U Bah Paul u la ong ba ki don shibun ki jingduna namar ka jingbymdon ki briew kiba don jingtip ha ka rukom treikam jong ka tnat naduh ka jingpynbiang ïa ki Utilisation Certificate bad Detail Project Report nalor kiwei kiwei ki jingdonkam.
