Shillong, Naiwieng 30
Ka Sorkar Jylla mynta ka la bynshet ha kawei ka kompani kaba kyrteng ka RITES na ka bynta ban pule bniah ïa ka jinglong jingman ka kad liengsuiñ ha Umroi khamtam ban pynbit pynbiang kum ka jaka hiar bad jaka kiew kaba pura jong ki liengsuiñ kiba heh bad ban lait noh na ka jingshah teh ki nongleit nongwan ha ka kad liengsuiñ ha Guwahati.
Kumba ka long mynta, ki paidbah na Meghalaya ki dang shaniah tylli ha ka kad liengsuiñ kaba ha Guwahati jong ka Assam namarba ka kad liengsuiñ ha Umroi kam long satia kaba pura namar ki liengsuiñ ruh kim pat don kiba heh bad dang duna kiba leit jingleit.
Ka RITES, ka dei ka kompani jong ka Sorkar India kaba ju leh ïa ki kam pule bniah ha ka liang ki jingpynïasoh lyngba ki kad liengsuiñ, lynti rel, surok bad duriaw nalor kiwei kiwei ki projek.
Ka tyllong khubor ka ïathuh ba ka RITES kan sa pyndep ïa kane ka kam bad ai ka kaiphod kaba tikna ha kano ka rukom yn lah ban pynbha ïa ka kad liengsuiñ ha Umroi kaba la don lypa da kaba kham pynduna ïa ka jinglut namar kam long kaba suk ban pynlut biang ban shna da kawei ka kad liengsuiñ kaba thymmai kaba ka jinglut ruh ka long kaba bun haduh katta katta ka ban kot haduh T.7000 ne T.8000 klur.
“La khmih lynti ba ka jingpynbha ïa ka kad liengsuiñ ha Umroi kan poi tang kumba T.2000 klur bad ïa kane yn leh lang lyngba ka jingkyrshan ka Sorkar Jylla bad Sorkar Pdeng,” la ïathuh ka tyllong khubor.
Kumba ka long mynta, ka Sorkar Jylla ka la khylliap noh ïa ka jingthmu ban tei kad liengsuiñ da kaba thymmai hynrei kan kham pynbha ïa ka kad liengsuiñ kaba la don lypa ha Umroi da kaba shna pynjrong ïa ka jaka hiar bad kiew ki liengsuiñ (runway) da kaba ot ruh ïa ki lum kiba long mawjynthut baroh shikatta.
Kham mynshwa, ka technical committee jong ka AAI ka la pyni ïa ka jinglut kaba heh ban pynbit pynbiang ïa ka kad liengsuiñ ha Umroi kynthup ruh ïa ka jingot ïa ki katto katne tylli ki lum kiba wit ha ka por ba kiew bad hiar ki liengsuiñ kiba heh.
Kumta ban ïa kaba tei ïa ka lad liengsuiñ kaba thymmai ka Sorkar ka kham mon ban pynbha noh ïa ka kad liengsuiñ ha Umroi.
Ka jaka hiar bad jaka kiew liengsuiñ (Runway) ha kad liengsuiñ ha Umroi ka don ïa ka jingjrong kaba long kumba 6000 phut, bad mynta la donkam ban pynjrong shuh shuh sha ka 8000 phut ban lah ki liengsuiñ kiba heh ban hiar bad kiew nalor kiwei pat ki jingdonkam kiba dei ban buh khnang ba ka kad liengsuiñ kan treikam pura man la ka sngi kumba long kiwei pat ki kad liengsuiñ.
