Shillong, Naiwieng 30
Kum shi bynta ban pynduna ïa ka jingkhapngiah jong ki surok ïaid kali hapoh ka nongbah Shillong, ka Sorkar Jylla ka la ïaid shaid-shaid shakhmat ban wanrah bad tei da ki jaka ïeng kali ha ki bynta bapher bapher.
Haba kren sha ki lad pathai khubor ha ka Sngi Palei, u Symbud Myntri Rangbah ka jylla u Bah Sniawbhalang Dhar uba khmih ruh ïa ka tnat Pynroi Sor u la pyntip ba ka sorkar kan sa tei da ki parking lot ne ki jaka ïeng kali kiba thymmai bad ki don katto katne lei kiba ka kam ka la sdang.
“Ha kane ka taïew, ngan sa mang sa ar tylli ki jaka pynïeng kali, ha kaba yn lah ban thep ne pynïeng haduh kumba 500 tylli ki kali. Nalor kane, ka tnat Pynroi Sor kan khreh ruh ban shim bad pyndonkam noh ïa kito ki jaka ba khlem pyndonkam jong kiwei pat ki tnat na ka bynta ban tei shuh shuh da ki jaka pynïeng kali,” la ong u Bah Sniawbhalang.
Shuh shuh haba pynpaw ba la dep ban khot ‘tender’ na ka bynta ki ar tylli ki jaka ïeng kali, u Bah Sniawbhalang u la ong ba kaba nyngkong yn tei bad pynïeng hajan jong ka Secretariat bad na ka bynta kawei pat yn sa dang wad ka jaka kaba biang.
Ha kawei pat ka liang, u la pyntip ruh ba ka Sorkar ka la pynkhreh shaid-shaid na ka bynta ban pynkynriah noh ïa ka Secretariat bad kiwei pat ki shlem treikam sorkar kiba kham kongsan kiba don ha lynter ka surok sha Khyndailad sha New Shillong.
U la ong, ynda la lah ban pynkynriah noh ïa kine ki shlem treikam sorkar sha New Shillong, kan sa ïarap shibun ban pynkylluid ïa kane ka jingeh na ka dheng kali bad ka jingkhapngiah kaba la mad mynta ha nongbah Shillong.
Shuh shuh u Symbud Myntri Rangbah u la ïathuh ruh ba na ka liang jong ka sorkar ka la dep ban sdang ïa ka jingpynkhreh ban pynkynriah ïa ki shlem treikam sorkar bad kiwei ki jingdonkam.
