Nongstoiñ, Naiwieng 30
Ki paidbah kiba la wan sha prokram kaba la tip kum ka ‘Hamara Sankalp Vikasit Bharat’ hapoh ka madan jong ka shnong Nongspung ha West Khasi Hills District ki la duh noh kynsan ban sakhi ïa ka jingkren markhmat jong u Myntri Rangbahduh ka Ri u Narendra Modi halor ki skhim bapher bapher ka Sorkar Kmie namar ka jingbym biang ka internet ha katei ka jaka.
Ïa katei ka prokram la pynlong da ki bor pynïaid District jong ka West Khasi Hills ha ka 30 tarik u Naiwieng 2023 ha kaba ha kane ka prokram ka la don ruh ka jingpyni dur markhmat ïa ki jingkren u Myntri Rangbahduh ka Ri u Narendra Modi uba la ïakren markhmat bad ki paidbah halor ki skhim bapher bapher jong ka Sorkar Kmie.
U Bah V Swer, ADC bad Project Director ka DRDA haba kren kum u kongsan ha katei ka sngi, u la ïathuh ba ka jingthmu jong kane ka prokram ka long ban ïathuh ïa ki skhim ka Sorkar Kmie kum ki ‘flagship scheme’, ba ïoh ki paidbah kim tip ïa kine ki skhim sha baroh ki nongshong shnong jong ka Ri India.
U la ïathuh ruh ba hangne hapoh ka District ruh yn pyntreikam ïa kine ki skhim khamtam ban ïoh pynrung kyrteng ïa kito ki nongshong shnong ki bym pat ïoh ïa ki jingmyntoi bad ban ïohsngew ruh ba kumno ki paidbah ki sngew shwa ba kin ïoh ïa kine ki skhim bad haba ki la ïoh ïa ki skhim.
U kongsan u la pynkut ruh ïa ka jingkren da kaba ïalam ïa ka jingpule ïa ka soskular ne ka pledge ïa baroh ki nongïashim bynta.
Shuh shuh ha kane prokram la don ka jingpynshai ïa ki skhim Sorkar bapher bapher sha ki paid nongshong shnong kum halor ka JJM, NRLM, ICDS, PMUY (free gas connection), MGNREGA, old age pension scheme (IGNOAPS), PMAY-G, Aadhaar Enrollment, Smart Card NRHM nalor kiwei kiwei pat kiba la ïoh jingpynshai na ki tnat sorkar bapher bapher khnang ba ki paidbah kin ïoh ïa kine ki jingmymtoi kiba wan na ka Sorkar Kmie.
Nalor nangta, ha kane ka sngi na ka liang ka tnat ka koit ka khiah ka la pynlong ruh ïa ka jingeksamin ïa ki paidbah ban lap ba ki don ne em ïa ka jingpang shini, jingpang BP.
