Tura, Naiwieng 30
Ka Achik Youth Welfare Organization (AYWO) bad ka Garoland State Movement Committee (GSMC) – Southern Zone ki la kam ba ka don ka jingkhaïi tuh ïa ka shini sha Bangladesh lyngba ki khappud na South Garo Hills.
Kitei ki artylli ki seng ki la ïoh bat ïa ki katto katne tylli ki trok ha ka 24 tarik Naiwieng ha shwa ba kin ujor sha u Deputy Commissioner ka South Garo Hills ha ka sngi kaba bud.
Kitei ki seng ki la lap ïa ki trok kiba kit ïa ka shini ïa kiba la suba ba ki dei kiba wan na Guwahati na ka bynta ban shalan be-aiñ sha Bangladesh. Ka daw jong ka jingdon kane ka jingleh be-aiñ ka long namar ka dor jong ka shini ha Bangladesh ka long beit T. 100 shi kilo lane tam.
Hadien ba la lap ïa ki trok hajan Nongalbibra, kitei ki seng ki la lap ïa shibun ki byrni ba la thep da ka shini bad ki la ring dur ruh ïa kine. Ïa kine ki dur la pynsaphriang ruh ha ki rynsan ‘Social Media’ bad hadien kata ki la leit ujor sha u DC.
“Kine ki trok ki la wan khlem ki kot ki sla kiba biang bad ki la ïai bteng ban pynkheiñ ïa ki aiñ kiba ïadei bad ka jingshalan mar shabar ri (Bangladesh). Kane ka kam ka long kaba heh bha namar man la ka step ki ju don kumba 30 haduh 40 tylli ki trok kiba ïaid,” la ong u Vice-President ka AYWO, u Sonji Sangma.
Shuh shuh la ong ba kane ka jingshalan shini be-aiñ ka la ïaid mynta la hynriew bnai eiei ha kaba ïa ka shini la wan kit na Assam ban pynpoi sha Bangladesh.
“Ki don kumba 1.7 lak ki nongshong shnong ha South Garo Hills, hynrei ka jingdon ka shini kaba phah sha South Garo Hills ka long shaba palat ha kaba lada pyndonkam lut, ki nongshong shnong ki lah ban ïoh ïa ki jingpang na ka shini. Ki don ki briew na Assam ryngkat bad ki nongshong shnong hangne kiba ïatreilang. Ka jylla jong ngi kam ïohnong eiei hynrei ki surok pat ki shah ktah na ka jingjulor,” la ong u Co-Chairman ka GSMC, u Lackystone R Sangma.
Nalorkata, la ong ba kitei ki trok ki hap ban ïaid lyngba 8 tylli ki jaka ba ju khynra ki pulit, hynrei ym ju ïohsngew ba kin shah bat.
“Lada kane kam dei ka dak ka shin jong ka jingkyrshan jong ki ‘riew saiñpyrthei ïa ka jingkhaïi tuh ïa ka shini, sa kaei pat? Ka jingheh jong ka dor ka long kaba la palat liam bad namarkata, ki don kiba ïa kwah ban kamai pisa. Hynrei dei ban tohkit ïa kane khnang ba ki jingshisha kin paw,” la ong u Lackystone.
