Shillong, Naiwieng:
U Secretary Shnong Mawlai Mawdatbaki, Bah L.S Lyngdoh u la ïathuh ba ki ar shaka bad kiwei kali ki hap ban ïaid shuki mynta ynda ki poi sha Mawlai naduh ba la buh ‘speed breaker’ ha lynter ka surok.
U la ïathuh ba ka jingmih ki ‘speed breaker’ ka dei naduh ba shah tynrah ka longkmie hapdeng surok ha ka ar shaka haduh ban da khlad na kane ka pyrthei.
Namar kata, u la aikhublei ïa u Bah Prestone Tynsong uba dei Symbud Myntri Rangbah ka jylla uba la ai bor ha ka tnat PWD ba kan phah ïa ki nongtrei ban buh ‘speed breaker’ naduh ka surok Mawdatbaki shi lynter.
U Bah Lyngdoh u la pyntip ba katei ka longkmie ba shah tynrah ha ka ar shaka ka dei kaba sah wai ha Kyntonmassar tangba ka shu hiar kali ha Mawdatbaki.
“Naduh ba la siang rong ïa ka surok ha Mawlai, ngi la pynkynmaw ïa ka tnat PWD ba kan buh ‘speed breaker’ hynrei haduh u bnai Nohprah 2022 kam shym la urlong” u la ong.
U la ïathuh ba ki nongkitkam shnong ki la leit ïakynduh kyrpang ïa ki pulit pynïaid kali ha Mawlai hynrei ki ai daw ba duna briew ban pynïaid kali ha Mawdatbaki kaba dei ka jaka ïeng ki Auto ba kamai sha Polo.
Kumta u la pyntip ba naduh ba la leit ïakynduh ïa u Bah Prestone ki pulit ki la wan ïeng ban pynïaid kali ha saw lad ba ïeng ki Auto ba kamai sha Polo.
Namar kata, u la kyntu ïa kiba ñiah ar shaka bad ñiah kali ba kim dei ban pynsted namar ka wanrah jingma ïa ki hi bad kiba ïaid lynti ruh.
Ha kajuh ka por u la ong ba lada buh da ki ‘speed breaker’ ki ar shaka kiba pynher kin kynting ïa ki bad ki kali kiba pynher kan pynsniew ïa ka kali jong ki, hynrei haba poi ha u ‘speed breaker’ ki hap ban ñiah suki ban lait na ka jingma.
