Shillong, Naiwieng 30
U President ka Meghalaya Upper Primary School Teachers Association (MUPSTA), u Bah Kenneth Shadap u la ong ba katkum ka jinglap jong ka tnad pule puthi ka sorkar jylla kaba la thung ïa ka jingtohkit ka la lap ba ki don ym duna ïa ka 15% ki skul rngai hapoh rilum Khasi, Jaiñtia bad Garo.
U Bah Shadap u la ong ba katkum ka jingïoh jingtip jong u na ki ophisar jong ka tnad pule puthi kiba dang pynlong ïa ka jingtohkit kaba bniah ban lap ïa ka jingdon jong ki skul rngai hapoh ka jylla baroh kawei, la shem ba ki don ki skul rngai ha kaba ki nonghikai jong kitei ki skul ki ïoh ïa ka tulop hynrei ym don khynnah skul satia.
“Ki don ki ophisar kiba la leit sha ki skul ban peit pyrthuh bad kylli ïa ka jinglong jingman jong ki skul kiba don na ki thup bapher bapher naduh ki Deficit haduh ki Government haduh ki Adhoc, ki don ki skul kiba don arngut ki nonghikai bad arngut ki khynnah skul, bad haduh laingut ne sawngut ki nonghikai ruh ki don, kane ka long ha baroh kawei ka jylla, ngam tip haduh katno ka sorkar kan weng ïa kine”, la ong u Bah Shadap.
U Bah Shadap u la ong ba um lah ban ong haduh katno tylli ki skul rngai ki don hynrei u la shu antad kumba 15% eiei na ka 100% ki don ki skul rngai hapoh ka jylla.
“Kata kadei ka jingïakren jong nga bad kito ki ophisar ka tnad pule puthi kiba leit khmih dalade”, la ong u Bah Shadap.
