Shillong, Naiwieng 30
Ki MLA na rilum Jaiñtia kiba kynthup ïa ki MLA na UDP bad NPP ki la kyrpad ïa u Myntri Rangbah ka jylla u Conrad K Sangma ba ka sorkar kan pynlong ïa ka tamasa sa ha Jowai ban kyntiew ïa ki kam jngohkai pyrthei bad ban kyntiew ïa ki sap ki phong jong ki samla ka thaiñ.
Ïa kane ka jingkwah ki MLA na Jaiñtia ban pynlong ka tamasa kaba heh ha Jowai ka dei kaba la pynpaw da u MLA ka Jowai u Bah Wailadmiki Shylla haba ai jingkren haba plie ïa ka phlim ‘Skap the Brother of skop’ bad phlim Da rai ha orchid inn resort, Thadlaskeiñ, Jowai kaba la long mynta ka Sngi Palei ka 30 tarik Naiwieng 2023, shisngi shwa ban pyni sha ki paidbah ha Loompyrding Iongpïah, Jowai naduh ka 1 tarik haduh ka 6 tarik Nohprah, 2023 man ka sngi.
U la ong ba lada pynlong ki tamasa tang ki samla ka thaiñ ym don ba wan peit ne wan sngap hynrei da pynlong ki tamasa kiba heh baroh ki ïa poi lut.
Kumta u la ïathuh ba ki MLA na Jaiñtia haba ki ïakynduh ïa u Myntri Rangbah ka jylla u Conrad K Sangma ki la pynsngew ba ha Khasi la pynlong da ka Cherry Blossom kaba ka sorkar ka la kyrshan pisa haduh ar klur duna, nangta kan sa long ka tamasa ruh ha Tura bad dei ban pynlong ruh sa ha Jowai.
“Ha kane ka jingïakren, u Myntri Rangbah u la kular ba ka sorkar jylla lada pynlong tamasa ha Jowai hynrei mynta ka shong ha ka jingstad ki MLA na Jaiñtia ban pynbeit ïa kane ka kam khnang ban plie lad ïa ki samla kiba donsap” u la ong.
Ha kajuh ka por u la ïathuh ba ha ka por ilekshon u ju buh ïa ka mat jingkular ban pynïoh hall ban pyni phlim Pnar ha Jowai. Ha ka jingbuddien, u Conrad u la pyntip ba mynta ka sorkar jylla kan shna shwa lai tylli ki cinema kawei ha Tura, Shillong bad Jowai lyngba ka CM Elevate kaba ai subsidy ïa ki ‘riew shimet kiba don jaka ba kin shna cinema hall.
Namar kata, u la kyntu ïa ki trai jaka kiba ju seng ki kam khaïi ba kin mih shakhmat ban shna cinema ha Jowai khnang ban pynneh pynsah ïa ki phlim kiba pynmih ha ka ktien lajong.
