Nongstoiñ, Naiwieng:
U District Magistrate jong ka West Khasi Hills District u Bah Garod LSN Dykes, IAS, u la pynjari syndon da ka kyndon 144 CrPC, kaba khang bad mana pyrshah ïa ka jingtih bad ka jingshalan beaiñ ïa u dewïong ha baroh ka West Khasi Hills District bad shabar ka District.
Ha ka kyrwoh, na ka liang u District Magistrate u la ong, ka jingshalan beaiñ ïa u dewïong hapoh bad shabar ka District kaba la pynkheiñ ïa ka hukum jong ka National Green Tribunal, ka Supreme Court jong ka Ri India bad High Court jong ka Meghalaya.
Shuh shuh u la mana ruh ba lada don kino-kino kiba ïaleh pyrshah yn pynshitom katkum ka aiñ. Kane ka hukum kan treikam mardor tat haduh ynda pynbna da kumwei pat.
