Shillong, Naiwieng 30
U MLA ka National People’s Party (NPP) na Jowai, Bah Wailadmiki Shylla u la pynpaw ba um kwah ban long doktor namar un sa klet ka kanshi bad thyrnia hapoh kpoh ki briew.
Ïa kine ki kyntien u Bah Shylla u la kren haba plie ïa ka phlim ‘Skap the Brother of skop’ bad ‘Da rai ha Orchid Inn Resort’ ha Thadlaskeiñ, Jowai kaba la long mynta ka Sngi Palei ka 30 tarik Naiwieng 2023, shisngi shwa ban pyni sha ki paidbah ha Loompyrding Iongpiah, Jowai naduh ka 1 tarik haduh ka 6 tarik Nohprah 2023 man ka sngi.
Ha kane ka sngi la ïadonlang ki tyngshop ki puron ka phlim Brother of skop, Bah Ebormi Muksor uba dei u director bad kum u trai, Kong Margarita Kynjin kaba dei ka trai, u Bah Commander Shangpliang uba dei u President ka Meghalaya Film Makers Association ryngkat ki tyngshop ki puron phlim Khasi bad Pnar bad ki ‘riew rangbah kiba shah khot sngewbha.
Haba ai jingkren kum u kongsan u Bah Shylla u la ong ba naduh dangrit u kwah palat ban long kum u briew ban shakri ïa ki paidbah kum ka kyrdan IAS. Namar ba u wan na longïing baduk hynrei haba u la pass ïa ka eksam matrik u la ïoh 86 percentage u kwah ban leit Arts tangba ha ïing ki kwah ban leit saïan, kumta u la hap ban kohnguh.
“Haba nga la pass bha, ki bahaïing ki la pynbor ïa nga ban leit pule doktor hynrei namar ngam hun ka mynsiem ha ka por ba nga pule nga ïoh kem pang ta ka daw nga rai ban iehnoh ïa ka jingpule doctor” u la ong.
U la ïathuh biang, “Nga sngewthuh ba lada nga pule doktor ngan pas beit, tangba lada nga pas ruh ngan dei u doktor u bym ler tam bad nga sheptieng ïoh nga kum klet ka kanshi bad thyrnia hapoh kpoh ki briew lada nga ïoh ban puid ïa ki nongpang”.
U Bah Wailadmiki u la ong ba namar ba um sngewtynnad ban pule doktor u la rai ban iehnoh bad sdang ban trei ïa ka kam shakri paidbah. Kane ka jingangnud ka la urlong da ka jingieid ki paidbah bad kyrkhu U Blei.
Kumta u la kyntu ïa ki nongak phlim haba ki thrang ban ak phlim haba u director u phah ïam dei ban ïam beit.
U la kyntu ïa ki nongshna phlim ba kin shna itynnad khnang ba ki paidbah haba ki thied ïa ka tiket kin hun ka mynsiem namar ki la pynlut ïa ka por.
Ha kane ka jingïalang la ïoh jingkren na u Bah Commander Shangpliang uba la pynpaw ïa ka jingeh ki nongpynmih phlim namar kim don la ka jong ka hall hynrei ki hap ban pyni ha ki hall shnong.
