Shillong, Naiwieng 30
Ka Myntri Sorkar ka Kong Ampareen Lyngdoh ka la ong ba ka khlem pat shah rai pynrem haba ïadei bad ka jingkynnoh pyrshah halor ka jyrsieh thung nonghikai ha kane ka Jylla, bad ym dei ban don mano-mano na ki seng saiñ pyrthei ki ban shim kabu bad pynpaw sha ka pyrthei kumba la shah rai pynrem.
Ka Kong Ampareen ka la jubab ïa kane haba kylli, kumno kan leh namar kiba pyrshah ïa ka, kin pyndonkam ïa kane ka jingkynnoh kum u dieng sympat ha ka por ilekshon.
“Ka mukotduma ka dang ïaid ha Ïingbishar, bad kam long ban kren eiei. Nga shu kwah ban ong ba ka kam ka dang ïaid bha hapdeng ka jingbishar bad ym pat don ka sien ba nga shah rai pynrem mynno-mynno. Namarkata, ai ba yn nym don ki seng saiñ pyrthei ki ban kren ïa kane bad ban pyni kumba nga la shah rai pynrem,” la ong ka Kong Ampareen.
Ka jingshisha kan sa paw, la ong ka Kong Ampareen kaba la pynpaw ka jingskhem ba ka jingbishar kan sa wan kumba ka dei ban long.
“Wat nym pyndonkam ïa kane namar ha kawei ka por kan don kaei-kaei ïa kine baroh. Ngan nym kren than bad ym don ba shah ñiew sniew tat haduh ban rai da kumwei. Ngam sheptieng namar nga la leh bun kiei kiei kiba khraw. Haba nga leit sha Ïingbishar, nga tip kaei kaba ïatai bad ïakren bad ym dei mano-mano na ki ‘riew saiñ pyrthei ne ki briew ha surok ban kren ïa kata,” ka la ong.
Kum ban pynkynmaw, ka mukotduma pyrshah ïa ka Kong Ampareen ka dang ïaid ha Ïingbishar ha kaba la shah kynnoh ba maka bad kiwei pat ki ‘riew saiñ pyrthei ki donkti ha ka kynrum-kynram thungkam nonghikai skul Lower Primary jong ka Sorkar Jylla ha ka por ba ka dang long ka Myntri ka tnat pule puthi ha u snem 2009-2010.
